Opens in a new tab

जापानी हवाई क्षेत्रमा रुसी विमान प्रवेश, लडाकू जेट परिचालन

एजेन्सी

325Shares

सारांश

  • जापानी हवाई क्षेत्रमा दुई संदिग्ध रुसी सैन्य विमान प्रवेश गरेपछि जापानले लडाकू विमान परिचालन गरी रुससमक्ष कडा विरोध जनाएको छ।
  • जापान सरकारले यस घटनालाई सार्वभौमिकता र सुरक्षामाथिको गम्भीर खतरा भन्दै भविष्यमा यस्ता गतिविधि नदोहोर्‍याउन माग गरेको छ।
  • युक्रेन युद्धपछि रुसविरुद्धको अन्तर्राष्ट्रिय प्रतिबन्धमा जापान सहभागी भएपछि दुई देशबीचको सम्बन्ध थप बिग्रिएको छ।
dida bag ad

टोकियो । आफ्नो हवाई क्षेत्र उल्लङ्घन गर्दै दुई संदिग्ध रुसी सैन्य विमान प्रवेश गरेपछि जापानले लडाकू विमान परिचालन गर्दै रुससमक्ष विरोध जनाएको छ ।

जापान सरकारका प्रवक्ता मिनोरु किहाराका अनुसार मङ्गलबार बिहान फुकुओकाको दक्षिणपश्चिममा पर्ने ओकिनोसिमा टापुनजिकै ती रुसी विमान जापानी हवाई क्षेत्रमा प्रवेश गरेका थिए । उक्त घटनालगत्तै जापानको आत्मरक्षा बलले रुसी विमानलाई चेतावनी दिन लडाकू जेट परिचालन गरेको थियो ।

प्रवक्ता किहाराले हवाई क्षेत्रको उल्लङ्घन जापानको सार्वभौमिकता र सुरक्षामाथिको गम्भीर खतरा भएको बताए । यस्ता गतिविधि पूर्ण रूपमा अस्वीकार्य रहेको उल्लेख गर्दै उनले कूटनीतिक माध्यमबाट रुससँग कडा विरोध जनाइएको र भविष्यमा यस्ता घटना नदोहोर्‍याउन माग गरिएको जानकारी दिए ।

यसैबिच, दक्षिण कोरियाले पनि आफ्नो हवाई रक्षा पहिचान क्षेत्रमा प्रवेश गरेका रुसी विमानको निगरानीका लागि लडाकू जेट परिचालन गरेको जनाएको छ । यद्यपि, रुसी विमानले आफ्नो सार्वभौम हवाई क्षेत्र भने उल्लङ्घन नगरेको सियोलले स्पष्ट पारेको छ ।

प्रशान्त महासागरका विवादित टापुको स्वामित्वलाई लिएर जापान र रुसबीच दशकौँदेखि तनाव रहँदै आएको छ । युक्रेन युद्धपछि जापानले रुसविरुद्धको अन्तर्राष्ट्रिय प्रतिबन्धमा सहभागिता जनाएसँगै दुई देशबीचको सम्बन्ध थप बिग्रिएको हो ।

यसअघि गत अगस्टमा रुसी राष्ट्रपति भ्लादिमिर पुटिनले विवादित कुरिल टापुको भ्रमण गरेको तथा त्यहाँबाट क्षेप्यास्त्र परीक्षण गर्ने रुसको घोषणाप्रति पनि जापानले कडा विरोध जनाएको थियो ।