पर्वतको कुश्माबाट यस्ताे देखियाे माछापुच्छ्रे हिमाल (तस्वीरहरू)

पर्वत । शरद् ऋतु, सफा मौसम, खुलेको आकाश र हिमालका मनमोहक दृश्यले पर्यटकीय गन्तव्यहरू आकर्षक देखिएका छन् । विशेषगरी पर्वतको कुश्मा नगरपालिका–८, अम्बोटबाट देखिने माछापुच्छ्रे हिमालको मनोरम दृश्यले यस क्षेत्रको प्राकृतिक सौन्दर्यलाई थप जीवन्त बनाएको छ ।

हरियाली पहाडको बीचमा मुस्कुराइरहेको माछापुच्छ्रे हिमाल, तल शान्त रूपमा बगिरहेको मोदी खोला, छेउबाट गएको मुख्य राजमार्ग र ग्रामीण परिवेशको आनन्द लिन चाहने पर्यटकका लागि यो क्षेत्र उपयुक्त गन्तव्य बनेको छ ।

वर्षायाम सकिएसँगै आकाश खुल्ने र हिमाल स्पष्ट देखिने समय भएकाले अहिले नेपालको पहाडी तथा हिमाली क्षेत्रको भ्रमणका लागि उत्कृष्ट समय मानिन्छ । यस मौसममा पर्यटकले हिमाली दृश्यावलोकन, प्रकृतिसँगको निकटता तथा यात्राको अनुभव लिन सक्छन् ।

पर्यटन व्यवसायीका लागि पनि शरद् ऋतु मुख्य पर्यटकीय सिजन हो । प्राकृतिक सम्पदाले भरिपूर्ण यस्ता गन्तव्यको प्रचारप्रसार र पूर्वाधार विकासमा जोड दिन सके पर्वतको पर्यटन सम्भावनालाई थप विस्तार गर्न सकिन्छ ।

तस्वीर : निशा श्रेष्ठ/नेपाल फोटो लाइब्रेरी