चैते धान ३९ हजार मेट्रिक टनले वृद्धि

नवलपुर टुडे


काठमाडौं । गत आर्थिक वर्ष २०८१/८२ मा चैते धानको उत्पादन ३८ हजार नौ सय ३८.८ मेट्रिक टनले वृद्धि भएको छ । राष्ट्रिय कृषि आधुनिकीकरण कार्यक्रमअन्तर्गत जोन/सुपरजोनका २६ वटा जिल्लामा चैते धान उत्पादनमा वृद्धि भएको हो ।
राष्ट्रिय कृषि आधुनिकीकरण कार्यक्रम व्यवस्थापन एकाइका सूचना अधिकारी डा.जीतबहादुर चन्दका अनुसार गत आर्थिक वर्ष २०८१/८२ मा १७ हजार चार सय ८६ हेक्टर क्षेत्रफलमा चैत धान रोपिएको थियो । त्यसमा एक लाख एक हजार चार सय १८.८ मेट्रिक टन धान उत्पादन भएको हो । उक्त क्षेत्रफलमा ५.८० मेट्रिकटन/हेक्टरले धान उपादकत्व भएको थियो ।
आर्थिक वर्ष २०८०/८१ मा ११ हजार तीन सय ६० हेक्टर क्षेत्रफलमा धान रोपिएकोमा ६२ हजार चार सय ८० मेट्रिकटन धान उत्पादन भएकोमा ५.५० मेट्रिकटन प्रतिहेक्टर उत्पादकत्व भएको उनले बताए ।
आर्थिक वर्ष २०८०/८१ को तुलनामा गत आर्थिक वर्ष २०८१/८२ मा ६ हजार एक सय २६ हेक्टर क्षेत्रफल बढीमा चैते धान खेती गरिएको राष्ट्रिय कृषि आधुनिकीकरण कार्यक्रम व्यवस्थापन एकाइले जनाएको छ ।
चैते धान खेती योग्य जिल्लामध्ये २१ वटा जिल्ला जोन र पाँच वटा जिल्ला सुपरजोन रहेका छन् । जोनमा सुनसरी, सिरहा, धनुषा, सर्लाही, रौतहट, चितवन, गोरखा, प्युठान, सल्यान, पर्वत, सप्तरी, बारा, पर्सा, नुवाकोट, मकवानपुर, तनहुँ, बाँके, कैलाली, महोत्तरी, नवलपरासी सुस्ता पूर्व र नवलपरासी सुस्ता पश्चिम रहेका छन् । सुपरजोनमा झापा, कञ्चनपुर, कपिलवस्तु, बर्दिया र मोरङ जिल्ला रहेका छन् ।
एकाइका सूचना अधिकारी चन्दले बर्सेनि चैते धान खेतीको क्षेत्र विस्तार हुँदै गएकाले पनि उत्पादनमा वृद्धि भएको बताए । धान जोनमा नपरेका वडाहरूले पनि धान जोनमा जोडिन खोजेकाले गर्दा पनि क्षेत्र विस्तार बढ्दै जान थालेको उनले बताए ।
समयमै राम्रो वर्षा भए जोन र सुपरजोनमा ९९ प्रतिशतले धान उत्पादनमा वृद्धि हुने एकाइले जनाएको छ ।
गत वर्ष राम्रो वर्षा भएकाले गर्दा पनि धान उत्पादनमा वृद्धि भएको उनले बताए । कृषिलाई आधुनिकीकरण गर्न उन्नत प्रविधि र आधुनिक प्रविधि किसान समक्ष विस्तार गर्नाले पनि किसानहरू चैते धान खेतीतर्फ आर्कषण बढेको उनको भनाइ छ ।
साना सिँचाइमार्फत किसानहरूको खेतसम्म सिँचाइ सुविधा र यान्त्रिकरणलगायतका सामाग्री वितरण गर्दै आइरहेको एकाइले जनाएको छ । एकाइले वर्षमा २० हजारदेखि ३० हजार हेक्टर क्षेत्रफलमा सिचाँइ सुविधा विस्तार गर्दै आइरहेको छ ।
कृषि पूर्वाधार निर्माणलगायतका काम पनि गर्दै आइरहेको उनले बताए । आगामी चैतमा करिब पाँच हजार हेक्टर चैते धानको क्षेत्रफल विस्तार गरेर लैजाने उनको भनाइ छ ।
पछिल्ला वर्ष मुलुकमा बढ्दो खाद्यान्न आयात, कृषि पेशामा युवा पुस्ताको घट्दो आकर्षण र रुचि तथा जलवायु परिवर्तनको असरले गर्दा कृषि क्षेत्रमा सुधारको आवश्यकता देखिइरहेको छ ।
यस सन्दर्भमा नेपालको कृषि क्षेत्रलाई आधुनिकीकरण र व्यावसायीकरण गर्दै उत्पादकत्व बढाउने तथा सो मार्फत रोजगारी पनि सिर्जना गर्ने उद्देश्यले सङ्घीय सरकारले प्रधानमन्त्री कृषि आधुनिकीकरण परियोजनाको सुरूवात गरेको थियो ।
यस परियोजनाले साना व्यावसायिक उत्पादन केन्द्रहरू (पकेट), मध्यम व्यावसायिक उत्पादन केन्द्रहरू (ब्लक), व्यावसायिक उत्पादन तथा प्रशोधन केन्द्रहरू (जोन) र बृहत् व्यावसायिक उत्पादन तथा औद्योगिक केन्द्रहरू (सुपरजोन) गरी चार सम्भागमा विशिष्टीकृत सघन कृषि क्षेत्रहरूको स्थापना गरी उत्पादन तथा उत्पादकत्वको वृद्धि गर्ने उद्देश्य लिएको छ ।
आर्थिक वर्ष २०७३/७४ बाट कार्यान्वयनमा आएको प्रधानमन्त्री कृषि आधुनिकीकरण परियोजनाको मध्यावधि समीक्षा नेपाल सरकार, कृषि तथा पशुपन्छी विकास मन्त्रालयको अनुरोधमा गरिएको हो ।
परम्परागत कृषि प्रणाली, कम उत्पादकत्व र न्यून यान्त्रीकरण लगायत बजार पहुँचको अभावले नेपालको कृषि क्षेत्र दिगो, प्रतिस्पर्धी र व्यावसायिक प्रणालीमा रूपान्तरण हुन सकेको छैन ।

धान काट्न व्यस्त छन् इलामका किसान

सुनसरीको हरिनगरमा छठ पूजास्थल तोडफोड गर्ने दुई युवक पक्राउ

छठ पर्वमा मधेशका विभिन्न घाटमा पुगे कांग्रेस सभापति गगन थापा

छठ पर्वलाई विश्व सम्पदा सूचीमा सूचीकृत गराउन सरकारसँग विजय यादवको माग

अरुपनि पढ्नुहोस
सबै
पूर्वाधार निर्माणसँगै पर्यटकीय गन्तव्य बन्दै कपासे भञ्ज्याङ

शुक्लागण्डकी फूल बिक्रीमा अग्रणी बन्दै

बेनीमा डेढ महिनापछि खानेपानी आपूर्ति

वाग्मतीसहित यी प्रदेशमा छ वर्षाको सम्भावना
















