नवलपरासी केरा उत्पादन संघको कार्यालयमा ताला बन्द

खुरसेद हजाम
नवलपरासी, साउन २ । नवलपरासी प्रतापपुर गाउँपालिका वडा न ८ गागापुरस्थित केरा उत्पादन संघको कार्यालयमा किसान र व्यापारीबाट तालबन्द गरेका छन ।

केरा उत्पादन संघले व्यापारी संग १.५ लाख धरौटी र केरा तौल प्रणाली खरिद गर्न प्रणालीको विरोध गर्दै, नवलपरासीका केरा किसान र व्यापारीले ताला बन्द गरेको हो । संघले मनोमानी ढङ्गले निर्णय गरेको र संघले मात्र ब्यापार गर्न खोजेको ब्यापारीहरुले आरोप लगाएका छन् ।

यसै क्रममा संघको कार्यालय अगाडी ‘धरौटी रकम खारेज गर’, ‘तौल प्रणाली खारेज गर’ जस्ता नारा लगाएका उनीहरुले नवलपरासी केरा उत्पादक संघका अध्यक्ष लख्खु यादवले पदबाट राजिनामा दिनुपर्नेसमेत माग गरेका छन ।

संघका अध्यक्ष यादवले भने आफूहरुले किसानको हितमा निणर्य गरेकोमा ब्यापारीहरु अतालिएर आन्दोलन गरेको बताए । विगतका वर्षहरुमा ब्यापारीहरुले किसानको केराको रकम समयमै भुक्तानी नगर्ने, केराको परिमाण भन्दा थोरै परिमाण देखाएर सोही अनुसार हिसाब गर्ने गरेकाले धरौटीको व्यवस्था लागू गरिएको बताए ।

यादवले व्यापारीले किसानको केराको भुक्तानी नगरेको खण्डमा धरौटी रकमबाट किसानलाई भुक्तानी दिने गरी कार्य गर्दा केरा किसान र केरा ब्यापारीहरुले संघको कार्यालयमा तालालगाएको समेत बताए । सो क्रममा दुबै पक्ष झडपसमेत भएका थिए ।