राजविराज विमानस्थलमा १० घण्टाभन्दा बढी उडान ढिलाइ, यात्रुलाई सास्ती

राजविराज । राजविराज विमानस्थलबाट काठमाडौंका लागि बुद्ध एयरको उडान १० घण्टाभन्दा बढी ढिलाइ हुँदा यात्रुहरू ठूलो सास्ती भोग्न बाध्य भएका छन् ।

सोमबार दिउँसो १ बजेदेखि विमानस्थलमा उडानको प्रतीक्षामा बसेका यात्रुहरूले लामो समयसम्म विमान नआउँदा सास्ती खेप्पनु परेको हो । काठमाडौंबाट दिउँसो २ बजे राजविराज आउनुपर्ने बुद्ध एयरको विमान साँझ ५ः३० बजे मात्र आइपुगेको थियो ।

विमानको प्राविधिक टोली काठमाडौंबाट विराटनगर हुँदै राजविराज पुगेको थियो । विमानको चक्का पञ्चर भएपछि उडानमा ढिलाइ भएको बताइएको छ । प्राविधिक समस्या समाधान गरी यात्रुहरूको पुनः जाँच (रिचेक) गरेपछि बुद्ध एयरको विमान राति १०ः३३ बजे राजविराजबाट यात्रु लिएर काठमाडौंका लागि उडेको थियो ।

लामो समयसम्म विमानस्थलमै प्रतीक्षा गर्नुपर्दा यात्रुहरू निकै समस्यामा परेका थिए । विदेश जाने यात्रुदेखि विभिन्न कामका लागि काठमाडौं जानुपर्ने यात्रुसमेत उडान ढिलाइका कारण प्रभावित भएका छन् ।

एउटै मात्र नियमित उडानमा निर्भर राजविराज विमानस्थलमा प्राविधिक समस्याका कारण घण्टौँसम्म उडान प्रभावित हुँदा यात्रुले भोग्नुपरेको सास्तीले हवाई सेवाको विश्वसनीयता र यात्रु सुविधामाथि प्रश्न उठाएको छ ।