‘पैसा डबल’ गर्ने भन्दै ठगी गर्ने रजक पुनः पक्राउ

राजविराज । सप्तरीको तिलाठी कोइलाडी गाउँपालिका वडा नम्बर ७ बभनगामाका रामबहादुर रजक ‘हनुमानी’ पुनः ठगी गरेको आरोपमा पक्राउ परेका छन् । ५२ वर्षीय रजकसँगै उनका सहयोगी ३४ वर्षीय गुञ्जेश सिंहलाई पनि प्रहरीले पक्राउ गरेको छ ।

उदयपुरका एक व्यक्तिले चिनजानका बभनगामाकै सिंहमार्फत रजकलाई ‘पैसा डबल’ गरिदिने भन्दै ५ लाख रुपैयाँ दिएका थिए । रकम डबल गर्न थप पैसा आवश्यक परेको भन्दै रजकले फोन गरेपछि ती व्यक्ति थप एक लाख रुपैयाँ लिएर रजकको घर पुगेका थिए ।

रजकको घर पुगेलगत्तै उनको मोबाइल खोसेर सम्पर्कविहीन बनाएपछि साथीसँग सम्पर्क गरी उनले प्रहरीलाई खबर गरेका थिए । त्यसपछि जिल्ला प्रहरी कार्यालय सप्तरीबाट खटिएको टोलीले रजकको घरबाट एक लाख रुपैयाँसहित रजक र सिंहलाई पक्राउ गरेको जिल्ला प्रहरी कार्यालय सप्तरीका प्रहरी उपरीक्षक रूपक खड्काले जानकारी दिए ।

उनका अनुसार पक्राउ परेका दुवै जनामाथि ठगी तथा आपराधिक विश्वासघात सम्बन्धी कसुरमा बुधबार तीन दिनको म्याद थप गरी अनुसन्धान भइरहेको छ ।

रजक यसअघि पनि ‘पैसा डबल’ गरिदिने भन्दै ठगी गरेको आरोपमा पक्राउ परेका थिए । उनी विरुद्ध १४ जनाले दिएको उजुरीका आधारमा प्रहरीले २१ पुस २०८१ मा उनलाई पक्राउ गरेको थियो । त्यसबेला ११ लाख रुपैयाँ धरौटी बुझाउन नसकेपछि उनी कारागार गएका थिए । पछि धरौटी रकम बुझाएर उनी रिहा भएका थिए ।