बालविवाह रोक्न कानुनसँगै सामाजिक सोच परिवर्तनमा जोड

रासस

325Shares

सारांश

जनकपुरधाममा आयोजित बालविवाह अन्त्यसम्बन्धी कार्यक्रममा उपप्रमुख किशोरी साहले कानुनी व्यवस्थासँगै समाजको सोच बदल्नुपर्नेमा जोड दिनुभयो।
वडाध्यक्ष पूर्णप्रसाद यादवले आफ्नो वडामा अहिलेसम्म सात वटा बालविवाह रोकिएको जानकारी दिँदै आगामी दिनमा पनि सचेतनामूलक कार्यक्रमलाई निरन्तरता दिने प्रतिबद्धता व्यक्त गर्नुभयो।
कार्यक्रममा वक्ताहरूले बालविवाह अन्त्यका लागि सरकार, स्थानीय तह, नागरिक समाज र समुदायबीच संयुक्त प्रयास तथा सहकार्य अपरिहार्य रहेको औंल्याएका छन्।

जनकपुर । जनकपुरधाम उपमहानगरपालिकाका उपप्रमुख किशोरी साहले बालविवाह अन्त्य गर्न कानुनी व्यवस्थासँगै समाजको सोच र व्यवहारमा परिवर्तन आवश्यक रहेको बताएकी छन् ।

जनकपुरधाममा मङ्गलबार आयोजित बालविवाह अन्त्यसम्बन्धी सामुदायिक सचेतना तथा पैरवी कार्यक्रममा उनले कुरीतिविरुद्ध समुदायस्तरमै सचेतना बढाउनुपर्नेमा जोड दिइन् ।

उनले सडक नाटकसहित विभिन्न माध्यमबाट बालविवाहविरुद्ध सचेतनामूलक कार्यक्रम सञ्चालन भइरहेको उल्लेख गर्दै यस्ता कार्यक्रमले सामाजिक चेतना बढाउन सहयोग पुग्ने बताइन् ।

राष्ट्रिय मानव अधिकार आयोगकी मधेस प्रदेश अधिकृत कुमारी शर्माले बालविवाह राष्ट्रिय समस्याका रूपमा रहेको उल्लेख गर्दै यसको अन्त्यका लागि समुदाय र सरोकारवाला निकायको संयुक्त प्रयास आवश्यक रहेको बताइन् ।

जनकपुरधाम उपमहानगरपालिका–१४ का वडाध्यक्ष पूर्णप्रसाद यादवले आफ्नो वडामा हालसम्म सात वटा बालविवाह रोकिएको जानकारी दिए । उनले आगामी दिनमा पनि सचेतनामूलक कार्यक्रमलाई निरन्तरता दिने प्रतिबद्धता जनाए ।

मुस्लिम महिला कल्याण समाज नेपालकी अध्यक्ष सीमा खानले बालविवाह अन्त्यका लागि नेपाल सरकारले राष्ट्रिय रणनीति अवलम्बन गरेको बताउनुभयो । बालविवाहमुक्त समाज निर्माण गर्न सरकार, स्थानीय तह, नागरिक समाज र समुदायबिच सहकार्य आवश्यक रहेको उनको भनाइ थियो ।

कार्यक्रममा सडक नाटकमार्फत बालविवाहका कारण किशोरीको शिक्षा, स्वास्थ्य र भविष्यमा पर्ने नकारात्मक असरबारे जानकारी गराइएको थियो ।