गैरआवासीय नेपाली नागरिकताको मुद्दालाई समाधान गर्छौँ : गृहमन्त्री लामिछाने

काठमाडौं, माघ ४ । उपप्रधान एवं गृहमन्त्री रवि लामिछानेले गैरआवासीय नेपाली नागरिकताको मुद्दालाई समाधान गर्ने बताएका छन् । बुधबार सिंहदरबारमा गैरआवासीय नेपाली संघका प्रतिनिधिसँगको भेटवार्ताका क्रममा उनले नागरिकताको सबै विषयलाई एकै ठाउँमा राखेर समाधानको प्रयास गर्दा गिजोलिएको बताएका हुन् ।

अब गैरआवासीय नेपाली नागरिकताको मुद्दालाई समाधान गर्न मन्त्रालय सक्षम रहेको लामिछानेको भनाइ छ । उनले विदेशमा रहेका नेपालीको लगानीलाई सुरक्षित गर्न पनि सरकार तयार रहेको बताए । नेपालमा लगानीका लागि गैरआवासीय नेपालीको कानुनी र व्यावहारिक कठिनाइबारे मन्त्रालय जानकार रहेकाले यसलाई गम्भीर भएर समाधानको प्रयास खोजिने उनले उल्लेख गरे ।

उनले नागरिकताको विषय समाधान भएपछि गैरआवासीय नेपालीको सम्पत्तिको हकको विषय पनि टुंगिने बताए । संघका अध्यक्ष कुल आचार्यले गैरआवासीय नेपालीका नागरिकता, भिसा, एयरपोर्टमा देखिने समस्यालगायत नेपालको विकासमा साझेदारी गर्ने विषयमा छलफल भएको र गृहमन्त्रीले समस्या समाधान गर्ने प्रतिबद्धता व्यक्त गरेको जानकारी दिए ।

संघले गरेको काम, नेपाल सरकारको तर्फबाट सम्बोधन भएका विषय र अबका दिनमा सरकारले गर्नुपर्ने नीतिगत र कानुनी सुधार सम्बन्धमा संघका तर्फबाट गृहमन्त्री लामिछानेलाई ज्ञापनपत्र पनि बुझाइएको थियो ।