गण्डकी प्रदेशका ऊर्जामन्त्री आचार्यलाई मन्त्री पदबाट हटाउने तयारी

पोखरा, कात्तिक २२ । गण्डकी प्रदेश सरकारका ऊर्जा, जलस्रोत तथा सिँचाईमन्त्री हरिशरण आचार्यलाई मुख्यमन्त्री कृष्णचन्द्र नेपाली पोखरेलले बर्खास्त गर्ने तयारी गरेका छन् । उनलाई आजै बर्खास्त गरिँदै छ ।

आसन्न प्रदेश तथा प्रतिनिधिसभा निर्वाचनमा एमाले उम्मेदवारलाई सहयोग गरेको भन्दै आचार्यलाई मुख्यमन्त्री पोखरेलले बर्खास्त गर्न लागिएको एक मन्त्रीले बताए । ती मन्त्रीका अनुसार आचार्यले पछिल्लो समय एमाले उम्मेदवारलाई मत माग्दै हिँडेको सूचना प्राप्त भएको छ । आचार्यलाई हटाउन मुख्यमन्त्री पोखरेलले प्रदेश प्रमुखलाई पत्र पठाउने तयारी भइरहेको उनले बताए ।

यता मन्त्री आचार्यले भने आफूलाई बर्खास्त गर्न लागेको कुरा थाहा नपाएको बताएका छन् । उनले आफूले कसैको पक्षमा भोट माग्ने काम नगरेकाले यो मिथ्या आरोप भएको बताए ।