बिहीबारदेखि बेपत्ता रहेका २ बालकको शव वाग्मती नदीमा फेला

रौतहट, असार ३१ । रौतहटको वाग्मती नदी किनारमा दुई जना बालकको शव फेला परेको छ । बिहीबार दिउँसोदेखि बेपत्ता भएका बालकको शव शुक्रबार बिहान भेटिएको हो ।

बिहीबार विद्यालयबाट फर्किएर वाग्मती नदीमा नुहाउन गएका दुर्गाभगवती गाँउपालिका- ३ मत्सरीका १३ वर्षीय हर्ष झा र वडा नं. २ भलोहियाका १३ वर्षीय आदित्य दास बेपत्ता भएका थिए । दुवै बालकको खोजी कार्यका लागि गोताखोरसहितका सुरक्षाकर्मीहरु परिचालन भएको थियो ।

खोज तलास गर्ने क्रममा हर्षकुमार झाको शव बिहीबार बिहान दुर्गाभगवती – ५ बहुअर्वामा र आदित्य झाको शव वडा नंं ३ पर्साटोलस्थित वाग्मती नदी किनारमा फेला परेको जिल्ला प्रहरी कार्यालय रौतहटका प्रवक्ता डिएसपी सुनिल मल्लले बताए ।

शव भेटिएपछि हाल मुचुल्कालगायतका कामहरु गरिरहेको जिल्ला प्रहरी कार्यालय रौतहटले जनाएको छ ।