जलविद्युत् कम्पनीको सामाजिक उत्तरदायित्वमा जोड

कास्की । कास्कीको मादी गाउँपालिकाले गाउँपालिकाभित्र सञ्चालनमा रहेका जलविद्युत् आयोजनालाई दायरामा ल्याउन पहल सुरु गरेको छ । गाउँपालिकाले सबै जलविद्युत् कम्पनीलाई पालिकामा सूचीकृत गर्ने तयारी गरेको हो ।

गाउँपालिकाले नेपाल सरकारको कम्पनी कानुनबमोजिम दर्ता भई सञ्चालनमा रहेका तर गाउँपालिकाको कार्यालयमा सूचीकृत नभएका जलविद्युत् कम्पनीलाई आवश्यक कागजातसहित पालिकामा सूचीकृत हुनका लागि आह्वान गरेको छ ।

गाउँपालिका अध्यक्ष देवीजङ्ग गुरुङले गाउँ कार्यपालिकाको यही कात्तिक १८ गतेको निर्णयअनुसार सबै जलविद्युत् कम्पनीलाई नियमानुसार सूचीकृत हुन सूचना जारी गरिएको बताए । “मादी गाउँपालिका जलविद्युत् उत्पादनको महत्त्वपूर्ण क्षेत्र हो । गाउँपालिकाभित्र करिब १० वटा जलविद्युत् आयोजना सञ्चालनमा रहेका छन् । थप आयोजनाले उत्पादन अनुमति लिएका तथा केही प्रस्तावित अवस्थामा छन् । तर प्रवर्द्धक कम्पनी पालिकामा सूचीकृत नभएकाले यो पहल सुरु गरेका हौँ”, अध्यक्ष गुरुङले भने ।

मादीको प्राकृतिक जलस्रोत उपयोग गरेर विद्युत् उत्पादन भइरहे पनि त्यसबाट स्थानीय बासिन्दाले पाउनुपर्ने लाभ, आयोजनाको सामाजिक उत्तरदायित्व र स्थानीय पूर्वाधार विकासमा कम्पनीले गर्नुपर्ने योगदानबारे पटकपटक प्रश्न उठ्दै आएपछि पालिकाले सूचीकरणको प्रक्रिया अघि बढाएको जनाएको छ ।

जलविद्युत् आयोजना निर्माण तथा सञ्चालनका क्रममा स्थानीय सडक, खानेपानी, खेतीयोग्य जमिन, वनजङ्गल, वातावरण र जनजीवनमा परेको प्रभावको उचित सम्बोधन हुनुपर्ने विषय स्थानीय र जनप्रतिनिधिले उठाउँदै आएका छन् ।

जलविद्युत् आयोजनाले स्थानीय क्षेत्रमा पारेको प्रभावसहित स्थानीय युवालाई रोजगारी तथा अवसर उपलब्ध गराउनुपर्ने र स्थानीय पूर्वाधारको संरक्षण तथा विकासमा कम्पनीको जिम्मेवारी स्पष्ट हुनुपर्ने मादी–४ का वडाध्यक्ष शिवप्रसाद सापकोटा बताउँछन् ।

उनले जलविद्युत कम्पनीको सामाजिक उत्तरदायित्व, स्थानीयसँग भएका सम्झौता, वातावरणीय प्रभाव, रोजगारी र पूर्वाधार विकासमा पुर्‍याएको योगदानको पारदर्शी समीक्षा हुनुपर्नेमा जोड दिए । “जलविद्युत कम्पनीलाई सूचीकृत गर्ने कार्य लगानीको वातावरण बिगार्न नभई लगानी र स्थानीय जनताको कानुनी अधिकारबिच न्यायोचित सन्तुलन कायम गर्नका लागि हो । मादीको प्राकृतिक स्रोतबाट हुने आम्दानी र त्यसको उपयोगबाट स्थानीय समुदायले न्यायोचित लाभ पाउनुपर्नेमा हाम्रो मुख्य जोड छ”, वडाध्यक्ष सापकोटाले भने ।

गाउँपालिका जलविद्युत् उत्पादनको प्रचुर सम्भावना भएको क्षेत्र भएकाले व्यवस्थित ऊर्जा विकासका लागि गाउँपालिका, जलविद्युत् कम्पनी र स्थानीय समुदायबिच समन्वय तथा सहकार्य आवश्यक रहेकामा जोड दिइएको छ ।