सिँचाइ कुलो निर्माणले लेखर्कमा धान उत्पादन बढाउन सहज

नवलपुर टुडे

सारांश
- भोजपुरको टेम्केमैयुङ गाउँपालिका–९ लेखर्क र काभ्रेबेँसी क्षेत्रमा सिँचाइ सुविधा विस्तार भएपछि किसानलाई धानखेती गर्न सहज भएको छ।
- विगतमा आकासे पानीको भरमा खेती गर्नुपर्ने बाध्यता रहेकामा विभिन्न कुलो तथा सिँचाइ आयोजना निर्माण भएपछि बालीमा पानी लगाउन झन्झट घटेको छ।
- वडा कार्यालयको पहलमा विभिन्न सिँचाइ संरचना निर्माण गरिएसँगै खेतीयोग्य जमिनको सदुपयोग बढेको र कृषि उत्पादनमा वृद्धि हुने अपेक्षा गरिएको छ।

भोजपुर । भोजपुरको टेम्केमैयुङ गाउँपालिका–९ लेखर्कको काभ्रेबेँसीलगायत क्षेत्रमा सिँचाइ सुविधा विस्तार भएपछि किसानलाई धानखेती गर्न सहज भएको छ । विगतमा सिँचाइको अभावमा खेतीपाती गर्न समस्या भोग्दै आएका किसान कुलो निर्माण भएपछि यस वर्ष सहज रूपमा धान उत्पादन गर्न सफल भएका हुन् ।
लेखर्क तथा काभ्रेबेँसी क्षेत्रलाई लक्षित गरी विभिन्न स्थानमा सिँचाइ कुलो निर्माण तथा विस्तार गरिएपछि खेतीयोग्य जमिनमा पानी पुर्याउन सहज भएको स्थानीय किसान टङ्कप्रसाद घिमिरेले बताउनुभयो । आकासे पानीको भरमा खेती गर्नुपर्ने बाध्यता रहेकामा कुलो निर्माणपछि धानखेती गर्न सहज भएको उनको भनाइ छ ।
“विगतका वर्षमा सिँचाइको अभावमा धान रोप्न निकै सास्ती थियो”, उनले भने, “सिँचाइ सुविधा भएपछि अहिले मनै लोभ्याउने गरी खेतमा धान फलाउन सफल भएका छौँ । सिँचाइ सुविधा पुगेका क्षेत्रमा धानखेती गर्न पानीको समस्या छैन ।”
सिँचाइ सुविधा उपलब्ध भएपछि धान रोपाइँ गर्न र बालीलाई आवश्यक परेको समयमा पानी लगाउन सहज भएको किसान घिमिरेले बताउनुभयो । खेतमा पानी पुर्याउन सकिने भएपछि खेतीपातीमा हुने कठिनाइ कम हुनुका साथै धान उत्पादनमा सहयोग पुगेको उनको भनाइ छ ।
टेम्केमैयुङ गाउँपालिका–९ का वडाध्यक्ष नभराज माङ्पाहाङका अनुसार लेखर्क तथा काभ्रे क्षेत्रका किसानलाई लक्षित गरी घिमाल कुलो, सुन्तले कुलो, बरडाँडा कुलो, जौबारी कुलो र विजालेस कुलोलगायत सिँचाइ आयोजना निर्माण गरिएका छन् । यी कुलोबाट स्थानीय किसानलाई खेतबारीमा पानी पुर्याउन सहज भएको उनले बताए ।
कृषि उत्पादन वृद्धि गर्न सिँचाइ सुविधा महत्त्वपूर्ण हुने भएकाले वडाले विभिन्न निकायसँग पहल तथा समन्वय गरेर आवश्यक संरचना निर्माण र विस्तारमा ध्यान दिँदै आएको वडाध्यक्ष माङ्गपाहाङ्गले बताए । खेतीयोग्य जमिनमा आवश्यक पानीको व्यवस्था गर्नसके किसानलाई खेतीपातीमा प्रोत्साहनका साथै कृषि उत्पादन बढाउन सहयोग पुग्ने उनको भनाइ छ ।
ग्रामीण क्षेत्रमा सिँचाइ सुविधा विस्तार भएपछि वर्षाको भरमा मात्र खेती गर्नुपर्ने बाध्यता कम हुँदै गएको छ । सिँचाइ कुलो निर्माणले किसानलाई धानखेती गर्न सहजतासँगै खेतबारीको उपयोग बढेको छ ।

मुद्रास्फीति बढेपछि श्रीलङ्काले ब्याजदर बढायो

चित्रसारीमा तीन दिने एकादशी मेला सुरु

इरानमाथि सैन्य कारबाही अपरिहार्य भएको नेतान्याहुको दाबी

द्विपक्षीय हित र सम्बन्ध विस्तारमा केन्द्रित हुन पूर्वपरराष्ट्रमन्त्रीहरूको सुझाव

अरुपनि पढ्नुहोस
सबै
झापाको दमकस्थित भाट–भटेनी सुपर स्टोर शनिबारदेखि पुनः सञ्चालनमा आउने

भेडा तथा बाख्रापालन व्यवसायमा आर्थिक रूपमा आत्मनिर्भर बनाउने कार्यक्रम तयारी

हरिबोधिनी एकादशीः देशभरका नारायण मन्दिरमा भक्तजनको लाम

प्यारापाइलट उत्पादन गर्न माछापुच्छ्रेमा खुल्यो प्याराग्लाइडिङ स्कुल
















