रूसी अधिकारीको ‘उत्तेजक’ टिप्पणीमा आणविक पनडुब्बी तैनाथ गर्न ट्रम्पको आदेश

काठमाडौं । अमेरिकाका राष्ट्रपति डोनाल्ड ट्रम्पले शुक्रबार रूसी संघीय सुरक्षा परिषद्का उपाध्यक्ष दिमित्री मेदभेदेभको ‘उत्तेजक’ भनाइपछि दुई आणविक पनडुब्बी रुसनजिक तैनाथ गर्न आदेश दिएका छन् ।

ट्रम्पले दिमित्री मेदभेदेभका टिप्पणीहरूलाई ‘मूर्खतापूर्ण र भड्काउ’ भन्दै ती ‘केवल शब्द मात्र नभएको’ हुनसक्ने आशंका व्यक्त गरे । उनले सामाजिक सञ्जालमा लेखेका छन्, ‘शब्दहरू धेरै महत्वपूर्ण हुन्छन् र यसले प्राय नसोचेको परिणाम निम्त्याउन सक्छ । मलाई आशा छ, यो त्यस्तो घटना हुनेछैन ।” 

पत्रकारहरूसँग कुरा गर्दै ट्रम्पले यो कदम ‘तयारी’को प्रयास भएको बताएका छन् । “उनी परमाणुबारे कुरा गर्दै थिए । जब परमाणुको कुरा आउँछ, हामीले तयार हुनुपर्छ । र हामी पूर्ण रूपमा तयार छौँ,” ट्रम्पले भने । 

रुसका पूर्वराष्टपति समेत रहेका दिमित्री मेदभेदेभले कुन टिप्पणीले ट्रम्पलाई यस्तो निर्णय लिन प्रेरित गर्‍यो भन्नेबारे प्रष्ट खुलाइएको छैन । तर, दुई नेताबीच केही समययता सामाजिक सञ्जालमा तिक्ततापूर्ण वाकयुद्ध चलिरहेको थियो ।

दुई आणविक शक्तिराष्ट्रका नेताबीचको यस प्रकारको सार्वजनिक द्वन्द्व र आणविक पनडुब्बी तैनाथीको घोषणालाई अन्तर्राष्ट्रिय मामिलाका जानकारहरूले गम्भीरतापूर्वक लिएका छन् ।
 
यसले गलत अनुमान र विश्वव्यापि तनाव अझ बढ्नसक्ने जोखिम रहेको उनीहरूको भनाइ छ । सीएनएन