चितवनका खेलकुद संघसंस्थालाई सूचिकृत हुन खेलकुद बिकास समितिको ताकेता

चितवन । चितवन जिल्ला खेलकुद बिकास समितिले जिल्लाका सम्पूर्ण खेलकुद संघ संस्थालाई सूचिकृत हुन ताकेका गरेको छ । समितिले सूचना जारी गर्दै खेलकुदसँग सम्बन्धित संघ संस्थालाई सूचिकृत गरी दर्ता हुन ताकेता गरेको हो ।

समितिको माघ ६ गते बसेको बैठकले सूचिकृत तथा दर्ताका लागि आग्रह गरेको थियो । समितिले सम्पूर्ण संघ संस्थालाई फागुन १५ गते भित्र कागजातसहित सूचिकृत तथा दर्ताका लागि पुन: आह्वान गरेको हो । जिल्लाका खेलकुद सम्बन्धित संघ संस्था, खेलाडी, प्रशिक्षक तथा निर्णायकहरुलाई व्यवस्थित गर्ने प्रकृया अघि बढाईएको समितिका अध्यक्ष राजन कार्कीले जानकारी दिनुभयो ।

दर्ता प्रकृयामा नजाने संघ संस्थाका लागि कुनै प्रकारको सिफारिस नगरिने सूचनामा उल्लेख छ । यस्तै त्यस्ता संघ संस्थालाई आर्थिकलगायत कुनै प्रकारको सहयोग नगर्न बागमती प्रदेश खेलकुद बिकास परिषद्लाई पत्रचार गरिने समेत सूचनामा भनिएको छ । समितिका अध्यक्ष कार्कीले आफूले कार्यभार सम्हाले लगत्तै जिल्लाको खेलकुद गतिविधिलाई व्यवस्थित गर्ने बिषयमा जोड दिएका छन् ।