विद्युतको अर्बौँ बक्यौता नतिर्ने उद्योगीको प्रतिरक्षामा प्रधानमन्त्री ओली

नवलपुर टुडे


उद्योगहरूले डेडिकेटेड फिडर र ट्रंकलाइनमार्फत सेवा लिँदा जनताले १८ घण्टासम्म लोडसेडिङको मार खेपेका थिए, सर्वसाधारणले बिजुली नपाएर मोटरबाट पानी तान्न पाएका थिएनन् भने विद्यार्थीले परीक्षाको तयारी टुकी बालेर गर्नुपरेको थियो
काठमाडौ । देशले लोडसेडिङको चर्को मार खेपिरहेका वेला डेडिकेटेड फिडर र ट्रंकलाइनमार्फत सेवा लिएको अर्बौँ प्रिमियम महसुल तिर्न आनाकानी गरिरहेका उद्योगीको प्रतिरक्षामा प्रधानमन्त्री नै उभिएका छन् । आइतबार संसद्मा विश्वासको मत लिने क्रममा प्रधानमन्त्री केपी ओलीले उद्योगीलाई बिलसमेत नबुझाई विद्युत् प्राधिकरणले मनपरी रकम असुल्न खोजेको आरोप लगाए । ६१ उद्योगले विद्युत् महसुलको आठ अर्ब २६ करोड तिर्न बाँकी छ ।
‘उद्योगीहरूले बक्यौता तिर्दैनौँ भनेका छैनन् । जति प्रयोग गरेका हौँ, त्यो तिर्छाैँ भन्नुभएको छ । प्रयोग कति गरेको हो, त्यसको बिल त सरकारले दिनुपर्छ,’ संसद्मा प्रधानमन्त्री ओलीले भने, ‘तिमी (उद्योगी) धनी छौ । तिमी (उद्योगी)सँग असुल गर्न मन छ । यति मलाई चाहिन्छ भनेर हुन्छ ?’
प्राधिकरणले उद्योगमा गलत हिसाब पठाएको पनि प्रधानमन्त्रीको दाबी छ । ‘मैले प्राधिकरणका एमडी (कुलमान घिसिङ)सहित ऊर्जामन्त्री, ऊर्जासचिव, मुख्यसचिव र उद्योगीलाई बोलाएर शुक्रबार छलफल गराएँ । उद्योगीले प्राधिकरणले भनेको विद्युत् उपभोग गरेका छैनन्, तर उहाँ (घिसिङ)को जवाफ छैन,’ उनले भने, ‘हिसाब बाँधिसकेँ, महालेखालाई आम्दानी भनेर देखाइसकेँ, अब त्यो कहाँ फेरबदल गर्न मिल्छ ? भनुभयो । गलत हिसाब पठाएर फेरबदल गर्न मिल्दैन भनेर तिर्न नपर्ने विद्युत् महसुल असुल गर्न सकिँदैन होला ।’
ओलीले संसद्मा उल्लेख गरेको शुक्रबारको बैठकमा घिसिङलाई लाइन काटिएका ६ उद्योगमा तत्काल विद्युत् जोड्न निर्देशनसमेत दिएका थिए । तर, घिसिङले गिरीशचन्द्र लाल नेतृत्वको आयोगको सिफारिसअनुसार मन्त्रिपरिषद्बाट निर्णय भएर आएको निर्देशन कार्यान्वयन गरेकाले मन्त्रिपरिषद्बाटै निर्णय भए कार्यान्वयन हुने जवाफ दिएका थिए । त्यसपछि प्रधानमन्त्रीले घिसिङलाई ‘तपाईं निर्णय गर्न सक्नुहुन्न भने तपाईंको विषयमा हामी निर्णय गर्छौँ’ भनेर चेतावनी नै दिएको स्रोतको भनाइ छ ।
संसद्मा प्रधानमन्त्रीले उद्योगीको विद्युत् महसुलको विषयमा फेरि छानबिन आवश्यक रहेको बताएका छन् । जब कि यसअघि सरकारले नै दुईवटा समिति र एउटा आयोग बनाएर सुझाव लिएको थियो । त्यस्तै, संसद्को सार्वजनिक लेखा समिति र महालेखाले पनि उद्योगीहरूबाट बक्यौता उठाउन निर्देशन दिएको थियो । यी सबै निकायहरूको प्रतिवेदन र सुझावका आधारमा नै मन्त्रिपरिषद्ले निर्णय गरेर प्राधिकरणलाई बक्यौता उठाउन निर्देशन दिएको थियो ।
तर, फेरि छानबिन आवश्यक रहेको प्रधानमन्त्री ओलीको भनाई छ । ‘उद्योगीले प्रयोग गरेको विद्युत्को महसुल तिर्छाैँ र प्रयोग नगरेको तिर्दैनौँ भन्नुभएको छ । मैले पनि असुलउपर नगर्नु भनेको छैन । असुलउपर गर्नुपर्ने गर्नुपर्छ, तर छानबिन गरेर मात्रै । अब यसमा छानबिन गर्नुपर्ने देखियो,’ उनले भने, ‘किनभने, विद्युत् प्राधिकरण र उद्योगीबीच ठूलो मतान्तर देखियो । त्यसको छानबिन गर्नुपर्ने भयो । उद्योग बन्द गरेर पैसा आउँदैन । उद्योग बन्द गरेर पैसा कहाँबाट ल्याएर तिर्ने ? उद्योग चल्न दिऊँ । उनीहरूसँग लिनुपर्ने बक्यौता असुल गरौँ । मन लागेजति असुल गर्न मिल्दैन । कानुनी राजमा बलजफ्ती गरेर तिमीसँग पैसा छ भनेर पाइँदैन । कानुनी राजमा पाउनुपर्ने पैसा पाइन्छ । सरकारले पनि लिनुपर्ने पैसा लिन्छ, तिराउनुपर्ने पैसा तिराउँछ । तिराउन नपर्ने पैसा तिराउँदैन ।’
प्रधानमन्त्रीले ६ उद्योगमा मात्रै लाइन काटेको विषयमा पनि प्राधिकरणलाई प्रश्न गरेका छन् । ‘यो विवाद आजको होइन । नौ वर्षदेखिको हो । यसमा अहिले विद्युत् महसुल लिनुपर्छ र तिर्नुपर्दैन भन्ने विवाद छ । यसमा अहिले आएर पहिलोपटक उद्योगमा विद्युत् काटिएको पनि होइन । यसभन्दा अघि पनि पटक–पटक काटिएका छन् । फेरि के–के मिलाइए र विद्युत् जोडियो । पटक–पटक काट्ने र जोड्ने काम भयो, यसरी भएन,’ उनले प्रश्न गरे, ‘अहिले ६ उद्योगमा मात्रै लाइन काटेको छ, अरू उद्योगमा किन नकाटेको ?
अर्थमन्त्री विष्णु पौडेलले पनि यसअघि सार्वजनिक रूपमै विद्युत् महसुल नतिर्ने उद्योगीहरूको बचाउ गरेका थिए । गत बुधबार नेपाल उद्योग वाणिज्य महासंघका प्रतिनिधिहरूसँगको भेटवार्तामा पौडेलले उद्योगीलाई पठाएको बिल नै गैरकानुनी भएको भन्दै प्राधिकरणमाथि आक्षेप लगाएका थिए ।
देश चरम लोडसेडिङमा फसेको समय ०७२ साउनदेखि ०७५ वैशाखसम्म प्राधिकरणले डेडिकेटेड फिडर र ट्रंकलाइनबाट उद्योगीहरूलाई २० देखि २४ घण्टासम्म विद्युत् उपलब्ध गराएको थियो । आमसर्वसाधारण मात्रै होइन, संवेदनशील अस्पतालहरूसमेत लोडसेडिङको मारमा पर्दा प्राधिकरणले उद्योगहरूलाई भने विद्युत् दिलाएको थियो । तर, उक्त विद्युत्को महसुल तिर्न उद्योगीले आनाकानी गर्दा विवाद चुलिँदै गएको छ । ६१ उद्योगीले उक्त अवधिमा प्रयोग गरेको विद्युत्को महसुल २२ अर्ब २४ करोड उठेकोमा यसअघि नै मन्त्रिपरिषद् बैठकबाट छुट दिएर आठ अर्ब २६ करोड कायम गरिएको थियो । तर, यो रकम तिर्न पनि उद्योगीहरू आनाकानी गरिरहेका छन् ।
प्राधिकरणलाई विद्युत् नियमन आयोगको निर्देशन– ६ उद्योगमा काटेको लाइन जोड्नू
विद्युत् नियमन आयोगले ६ उद्योगमा काटेको लाइन जोड्न विद्युत् प्राधिकरणलाई निर्देशन दिएको छ । आयोग अध्यक्ष रामप्रसाद धितालले ६ उद्योगमा लाइन जोड्न लिखित निर्देशन दिएको जानकारी दिए । आयोग सचिव तथा प्रवक्ता मनदेवी श्रेष्ठले पनि उद्योगहरूबाट गुनासो दर्ता भएपछि निर्णय गरिएको बताइन् । ‘गत शुक्रबार ६ उद्योगबाट गुनासो दर्ता भएको थियो । विद्युत् उपभोक्ता हित संरक्षणसम्बन्धी निर्देशिका, २०८० अनुसार लाइन जोड्न निर्देशन दिएका हौँ,’ उनले भनिन् ।
विद्युत् महसुलको बिललगायत विषयमा चित्त नबुझे ग्राहकले आयोगमा गुनासो दर्ता गर्न सक्ने निर्देशिकाको दफा १३ को उपदफा १ मा छ । त्यस्तै, उपदफा १० मा उद्योग गुनासो समाधान हुनुअघि वितरण अनुमतिपत्र प्राप्त व्यक्ति वा विद्युत् वितरण गर्ने सामुदायिक संस्था (प्राधिकरण)ले सम्बन्धित उपभोक्ताको विद्युत् आपूर्ति विच्छेद गर्न नपाउने व्यवस्था छ । सोहीअनुसार गुनासो आएकाले ६ उद्योगमा लाइन जोड्न निर्देशन दिएको श्रेष्ठले बताइन् । त्यस्तै, आयोगले यस विषयमा एक महिनाभित्र प्रतिवेदन पठाउन पनि निर्देशन दिएको छ ।
संसद्को रोस्टमबाट विद्युत् प्राधिकरणमाथि आरोप लगाउँदै प्रधानमन्त्रीले भने– उद्योगीहरूले बक्यौता तिर्दैनौँ भनेका छैनन् । जति प्रयोग गरेका हौँ, त्यो तिर्छाैँ भन्नुभएको छ । प्रयोग कति गरेको हो, त्यसको बिल त सरकारले दिनुपर्छ । तिमी (उद्योगी) धनी छौ । तिमी (उद्योगी)सँग असुल गर्न मन छ । यति मलाई चाहिन्छ भनेर हुन्छ ? उद्योग बन्द गरेर पैसा आउँदैन । उद्योग बन्द गरेर पैसा कहाँबाट ल्याएर तिर्ने ? उद्योग चल्न दिऊँ । उनीहरूसँग लिनुपर्ने बक्यौता असुल गरौँ । मन लागेजति असुल गर्न मिल्दैन । कानुनी राजमा बलजफ्ती गरेर तिमीसँग पैसा छ भनेर पाइँदैन ।
संसदीय समितिदेखि सरकारी आयोगसम्मले दिएका थिए बक्यौता उठाउन निर्देशन
- डेडिकेटेड र ट्रंकलाइन सेवा लिएका ग्राहकको अवस्था पहिचान गर्न लोडसेडिङ सकिएकै दिन ३१ वैशाख ०७५ मा प्राधिकरण सञ्चालक समिति सदस्य भक्तबहादुर पुनको संयोजकत्वमा उपसमिति गठन भयो । जसले औद्योगिक ग्राहकबाट तत्कालीन विद्युत् महसुल निर्धारण आयोगले तोकेको प्रिमियमसहितको शुल्क लिन सुझाव दियो ।
- महसुल विवाद समाधानका लागि केपी ओली नेतृत्वको तत्कालीन सरकारले ऊर्जासचिव दिनेश घिमिरे नेतृत्वमा २१ पुस ०७६ मा फेरि समिति बनायो । समितिले ०७२ माघदेखि ०७५ वैशाखसम्मको प्रिमियम महसुल उठाउन सिफारिस गर्यो । ०७२ साउनदेखि पुससम्म र लोडसेडिङ अन्त्य भएपछिको अवधि सम्बन्धमा निर्णय गर्न भने नियमन आयोगलाई जिम्मा छाड्यो ।
- ओली नेतृत्वकै मन्त्रिपरिषद्ले १९ साउन ०७७ मा घिमिरे नेतृत्वको समितिले तयार गरेको प्रतिवेदन कार्यान्वयन गर्ने निर्णय गर्यो । २६ साउन ०७७ मा ऊर्जा मन्त्रालयबाट कार्यान्वयनका लागि प्राधिकरण र आयोगमा पत्रचार भयो ।
- ३० साउन ०७७ मा अख्तियारले लोडसेडिङ अन्त्य हुनुअघिको अवधिको प्रिमियम शुल्क असुल गर्न सुझाव दियो ।
- २४ पुस ०८० मा सरकारले पूर्वन्यायाधीश गिरीशचन्द्र लालको नेतृत्वमा आयोग नै बनायो । आयोगको प्रतिवेदनलाई आधार मानेर २७ वैशाख ०८१ मा अघिल्लो सरकारले ०७२ माघदेखि ०७५ वैशाखसम्मको प्रिमियम महसुल उठाउने निर्णय गर्यो । र, २० जेठमा ऊर्जा मन्त्रालयमार्फत प्राधिकरणलाई बक्यौता उठाउन निर्देशन दियो ।
संसदीय समितिले पनि भनेको थियो– ०७२ साउनदेखिको प्रिमियम महसुल असुल गर्नू
विद्युत् बक्यौताको विवाद चुलिँदै गएपछि संसद्को सार्वजनिक लेखा समितिले समेत यसबारे अध्ययन गरेको थियो । पर्याप्त छलफलपछि २५ चैत ०७७ मा समितिले उद्योगीहरूबाट ०७२ साउनदेखिको प्रिमियम शुल्क असुल गर्न ऊर्जा मन्त्रालयमार्फत विद्युत् प्राधिकरणलाई निर्देशन दियो ।
डेडिकेटेड र ट्रंकलाइनको सबै महसुल असुल गर्नू : महालेखा
महालेखापरीक्षकको कार्यालयले पनि पछिल्ला हरेक प्रतिवेदनमा उद्योगहरूबाट विद्युत् बक्यौता उठाउन भन्दै आएको छ । ‘…यसबापत ६२ उद्योगले २१ अर्ब ८८ करोड रुपैयाँ बक्यौता तिर्न बाँकी छ । त्यो रकम आवश्यक समन्वयन गरेर असुल गर्नुपर्छ,’ गत जेठमा सार्वजनिक ६१औँ वार्षिक प्रतिवेदनमा भनिएको छ । यो समाचार नयाँ पत्रीकामा मिलन विश्वकर्माले लेख्नुभएको छ ।

फोहर बिक्रीबाट व्यास नगरपालिकालाई नौ लाख आम्दानी

विदेशको रोजगारी छाडेर गाउँमै भैँसीपालन, घ्यू बेचेर वार्षिक तीन लाख बचत

बैसरी–रिसिनचौतारी सडक स्तरोन्नति सुरु, तीन करोड ३५ लाख लागतमा काम हुँदै

झापाको चिया उद्योगमा आगलागीबाट ३० लाखको क्षति

सन् २०२७ देखि पर्वतीय जलवायु कार्यक्रम सञ्चालन गर्न नेपालको प्रस्ताव
अरुपनि पढ्नुहोस
सबै
नमोबुद्ध जात्रा: करुणा र देहत्यागको बौद्ध मान्यता जोडिएको ऐतिहासिक मेला

हुलाकी सडकले फेरिएको राप्तीपारिको मुहार, आधा घण्टामै पुगिन्छ नेपालगञ्ज

राष्ट्र बैङ्कद्वारा विदेशी मुद्राको विनिमयदर निर्धारण

















