भारत ‘ए’संग नेपाल ९ विकेटले पराजित

भारतको जितमा अभिषेक शर्माले ८७ रनको उत्कृष्ट पारी खेले । उनलाई नेपालका कप्तान रोहित पौडेलले कुशल मल्लको हातबाट क्याचआउट गराए । साई सुदर्शन ५८ र ध्रुव जुरेल २१ रनमा नटआउट रहे । यसअघि टस जितेर पहिले व्याटिङ गरेको नेपाल ३९.२ ओभरमा सबै विकेट गुमाउँदै १६७ रन मात्रै बनाउन सकेको थियो ।

नेपालका लागि कप्तान रोहित पौडेलले सर्वाधिक ६५ रन बनाए । गुल्शन झाले ३८ रन बनाए भने अन्य व्याटरले राम्रो प्रदर्शन गर्न सकेनन् । नेपालले पहिलो पावर प्लेको १० ओभरमा ३७ रनमै ५ विकेट गुमाएको थियो । भारतका लागि निसान्त सिन्धुले सर्वाधिक ४ विकेट लिए ।

नेपाल प्रतियोगिताको आफ्नो पहिलो खेलमा पाकिस्तान ‘ए’संग ४ विकेटले पराजित भएको थियो । अब समूह चरणको अन्तिम खेलमा नेपालले युएई ‘ए’संग खेल्ने छ ।