सेतोपाटी अनलाइनलाई सोधेको पत्र निर्वाचन आयोगबाट फिर्ता

काठमाडौ, कार्तिक २१ । निर्वाचन आयोगले सेतोपाटी अनलानलाई समाचार हटाउन दिएको निर्देशन फिर्ता लिएको छ । प्रदेश १ को झापा – १ का एमाले उम्मेदवार अग्नि खरेलका छोरा बारे लेखिएको समाचार हटाउन आयोगले क्षेत्रधिकार बाहिर गएर दिएको निर्देशनको चर्को आलोचना भएपछि आयोगले आइतबार साँझ बसेको बैंठकले निर्णय कार्यान्वयन नगर्ने निर्णय गरेको हो ।

´संचारमाध्यम अनुगमनको काम हाम्रो होइन, प्रमुख निर्वाचन आयुक्त दिनेश थपलियाले भने, ´आयोगको निर्णयमा भएको कमजोरी आयोगले सच्याएको छ, उक्त निर्णय कार्यान्वयन हुदैन । प्रमुख आयुक्त थपलिया जिल्ला बाहिर रहेको बेला निर्वाचन आयुक्त रामप्रसाद भण्डारीले उक्त निर्देशन दिएका थिए ।

स्रोतका अनुसार निर्णय विवादमा परेपछि शनिबार राति नै आयोगका पदाधिकारी र कर्मचारीको बैंठक बसेको थियो । तर, भण्डारी आफ्नो निर्णयबाट पछि नहट्ने अडान लिएका थिए । प्रमुख आयुक्त थपलियाले राजधानी फर्केपछि सार्बजनिक कार्यक्रमबाटै निर्णय सच्याउने बताएका थिए ।

निर्वाचन आयोग पछि हटेलगतै सेतोपाटी अनलाइनलाई प्रेस काउन्सिलले २४ घण्टे स्पष्टीकरण सोधेको छ । उम्मेदवारलाई नकारात्मक प्रभाव पार्ने समाचार सम्प्रेषण गरेको भन्दै त्यसको कारण २४ घण्टाभित्र पेश गर्न काउन्सिलले सेतोपाटीलाई पत्र पठाएको हो । झापा क्षेत्र नम्बर १ का एमाले उम्मेदवार अग्नि खरेलका छोरा अमेरिकी सेनामा रहेको र उनको नेपाली नागरिकता कायमै रहेको भन्ने समाचारमै काउन्सिलले सेतोपाटीलाई आइतबार पत्र काटेको थियो ।