अव्यवस्थित रामग्रामको चोक चोकमा दुर्घटनाको जोखिम बढ्दै, सम्बन्धित निकाय मौन

रामजी प्रजापति
नवलपरासी, असोज ६ । पश्चिम नवलपरासीको रामग्राममा विभिन्न चोक र बाटोमा ठेलाहरु लगाइदिदा बाटो अवरुद्ध भैरहेको छ । उक्त बाटोमा हिड्ने मेयर, उपमेयर, बिधायक लागायतको समेत आँखा पुग्न सकिरहेको अवस्था छैन ।

रामग्राम नगरपालिकाले विभिन्न व्यवसायी, ब्यापारीहरुलाई नाला बाहिर केही पनि सर सामान नराख्न अनुरोध गरेका थिए । धेरै जसो ब्यापारीहरुले आफ्नो सिमित क्षेत्रमा सामान राखेर काम सुरु गरेका छन । बिगत केही महिनादेखि रामग्राममा बनाइएको नवनिर्मित घण्टाघर र बुद्ध चोक लगायत विभिन्न चोक चोकमा ठेला र ई-रिक्सा राख्दै आईरहेका छन । जुन कि त्यही चोकमा आएर एउटा मोटरसाइकलमा सवार दुई जनाको दुर्घटनासमेत भएको थियो ।

दुर्घटनामा पर्नेहरु म्यादीको लागि फारम भर्न आएका थिए । उनीहरुको टाउको, खुट्टामा चोट लागेर रगत निस्किएको अवस्था थियो । स्थानीयहरुको गुनासो अनुसार घर अगाडि ठेला लगाउदा घरको सोभासमेत बिग्रेको र आवत जावत गर्दा धेरै जनाको दुर्घटना समेत भएको जानकारी गराएका छन ।

रामग्राम बजार क्षेत्रमा दुर्घटना न्युनिकरण गर्नको लागि सबै भन्दा पहिला नाला बाहिर व्यापार गर्न, ठेला लगाउन, ई-रिक्सा राख्न, फलफुल लगायतका सबैको ब्यवस्थापन गर्न पर्ने नगरपालिकालाई ध्यानाकर्षण गराउदै समाजसेवी ब्यक्तित्व दिलिप कुमारले जानकारी गराए ।