Opens in a new tab

एयर रुटभन्दा नियमित उडानलाई प्राथमिकता दिनुपर्नेमा जोड

संबाददाता

29Shares
dida bag ad

भैरहवा । गौतमबुद्ध अन्तर्राष्ट्रिय विमानस्थललाई पूर्ण क्षमतामा सञ्चालन गर्न भारतसँग थप हवाई प्रवेशमार्ग (एयर रुट) को सहमतिभन्दा नियमित अन्तर्राष्ट्रिय उडान सञ्चालनलाई प्राथमिकता दिनुपर्नेमा सरोकारवालाले जोड दिएका छन् ।

विमानस्थल सञ्चालनमा आएको लामो समय बितिसक्दा पनि नियमित अन्तर्राष्ट्रिय उडान हुन नसक्दा अर्बौं रुपैयाँ लगानीका पर्यटन तथा होटल पूर्वाधार उपयोगविहीन बनेका छन् । निजी क्षेत्रले प्राविधिक समस्या, काठमाडौंकेन्द्रित हवाई सेवा र व्यवस्थापकीय कमजोरीलाई विमानस्थल सञ्चालनका प्रमुख चुनौती मानेको छ ।

विमानस्थलमा जडान गरिएको इन्स्ट्रुमेन्ट ल्याण्डिङ सिस्टम (आईएलएस) प्रभावकारी रूपमा सञ्चालन गर्न भारतसँग आवश्यक प्राविधिक सहमति जुटाउनुपर्ने सरोकारवालाको भनाइ छ । साथै, अन्तर्राष्ट्रिय वायुसेवा कम्पनीलाई आकर्षित गर्न, यात्रु बजार विस्तार गर्न र वैदेशिक रोजगारी तथा पर्यटनसम्बन्धी सेवा भैरहवामै उपलब्ध गराउनुपर्ने माग गरिएको छ ।

होटल तथा रोष्टुरेन्ट व्यवसायी संगठन रुपन्देहीका अध्यक्ष राजेश महोत्राका अनुसार भैरहवा–लुम्बिनी क्षेत्रमा होटल तथा पर्यटन व्यवसायमा एक खर्ब रुपैयाँभन्दा बढी लगानी रहेको छ । नियमित अन्तर्राष्ट्रिय उडान नहुँदा बैंकको ऋण, ब्याज र सञ्चालन खर्च धान्न व्यवसायीलाई कठिन भइरहेको छ ।

सरोकारवालाले भारतका प्रमुख सहरसँग सीधा हवाई सम्पर्क विस्तार, चार्टर उडान सञ्चालन, अन्तर्राष्ट्रिय प्रचारप्रसार तथा काठमाडौंका केही अन्तर्राष्ट्रिय उडान भैरहवा सार्न सरकारसँग माग गरेका छन् ।

उनीहरूले गौतमबुद्ध अन्तर्राष्ट्रिय विमानस्थल सञ्चालनका लागि प्राविधिक सहमति, व्यवस्थापकीय स्वायत्तता, सरकारी सेवा विकेन्द्रीकरण र नियमित उडान विस्तारलाई समेटेर एकीकृत योजना ल्याउनुपर्नेमा जोड दिएका छन् ।