जुकरबर्गदेखि बिल गेट्ससम्म : प्रलयको डरले अर्बपतिहरू बनाउँदैछन् विलासी भूमिगत बंकर

न्युयोर्क । सम्भावित प्राकृतिक विपत्ति, युद्ध र विश्वव्यापी संकटबाट बच्न विश्वका अर्बपति तथा चर्चित व्यक्तिहरूले भूमिगत विलासी बंकर निर्माण गर्न थालेका छन् । सामान्य आपत्कालीन आश्रयस्थलभन्दा फरक यी बंकरमा स्विमिङ पुल, जिम, आधुनिक स्वास्थ्य सुविधा र अन्य विलासी संरचना निर्माण गरिँदैछ । लन्डनस्थित एक वास्तुकला कम्पनीका अनुसार पछिल्ला वर्षमा यस्ता बंकर निर्माणबारे सोधपुछ १२ गुणाले बढेको छ ।

फेसबुकका संस्थापक मार्क जुकरबर्ग, अमेरिकी अर्बपति बिल गेट्स, हलिउड अभिनेता टम क्रुज तथा पूर्वबास्केटबल खेलाडी शाकिल ओ’निलजस्ता चर्चित व्यक्तिहरूले भूमिगत सुरक्षित आश्रयस्थल निर्माण गर्ने वा त्यसको सम्भावना खोज्ने गरेको चर्चा छ ।

जुकरबर्गले प्रशान्त महासागरको हवाईस्थित आफ्नो विशाल सम्पत्तिमा ५ हजार वर्गफिटको भूमिगत बंकर बनाइरहेको बताइएको छ । करिब १ हजार ४०० एकड क्षेत्रफलमा फैलिएको उनको कम्पाउन्डमा एक दर्जनभन्दा बढी भवन छन् । उक्त सम्पत्तिको मूल्य कम्तीमा २ अर्ब ४३० करोड रुपैयाँ रहेको उल्लेख गरिएको छ ।

त्यहाँ ३० भन्दा बढी शयनकक्ष र स्नानघर भएका भवन, कार्यालय, सम्मेलन कक्ष, औद्योगिक आकारका भान्सा तथा अत्याधुनिक मनोरञ्जन सुविधाहरू छन् । एउटा भवनमा पूर्ण आकारको जिम, पौडी पोखरी, साउना, तातोपानीको टब र टेनिस कोर्टसमेत रहेको बताइएको छ ।

यसैगरी, अमेरिकी सञ्चारकर्मी तथा व्यवसायी काइली जेनरले लस एन्जलसस्थित आफ्नो ३० हजार वर्गफिटको आधुनिक फार्महाउसमा भूमिगत बंकर निर्माण गरिरहेको समाचारमा उल्लेख छ । उनले आफ्नो निजी सुरक्षा र गोपनीयताका लागि ठूलो रकम खर्च गरिरहेकी छन् ।

६२५ अर्बपतिका लागि विशेष बंकर
अमेरिकाको भर्जिनियामा ‘सेफ’ नामक कम्पनीले ‘एरी’ नामको विलासी बंकर निर्माण गरिरहेको छ । गत वर्ष सार्वजनिक विवरणअनुसार, यसमा विश्वका ६२५ जना धनी व्यक्तिका लागि आवासको व्यवस्था हुनेछ ।

यसको सदस्य बन्न प्रत्येक व्यक्तिले करिब १ करोड ५० लाख पाउन्ड अर्थात् १६२ करोड रुपैयाँ तिर्नुपर्नेछ । बंकरमा मेमोरी फोमका गद्दा, संगमरमरका भुइँ, कृत्रिम बुद्धिमत्तामा आधारित स्वास्थ्य सेवा, भित्री पौडी पोखरी र चिसो पानीमा डुब्ने सुविधा हुने बताइएको छ ।

लन्डनको वास्तुकला कम्पनी ‘जानिन स्टोन एन्ड कम्पनी’का अनुसार, यस्ता सुरक्षित संरचनाको माग अभूतपूर्व रूपमा बढेको छ । कम्पनीले विलासी भूमिगत बंकरको डिजाइनमा सम्भावना असीमित रहेको जनाएको छ ।

सामान्यतः विपत्तिको तयारी गर्दा खानेकुरा, पानी र प्राथमिक उपचार सामग्री भण्डारण गर्ने गरिन्छ । तर अर्बपतिहरूका लागि यस्तो तयारीको अर्थ आधुनिक सुविधा सम्पन्न सुरक्षित आवास निर्माण गर्नु बनेको छ ।

यद्यपि, सबै चर्चित व्यक्तिहरूले भूमिगत आश्रयस्थल रोजिरहेका छैनन् । बेलायती पप गायिका हन्ना स्पिरिटले भने सहरको चकाचौंध छाडेर प्रकृतिनजिकको जीवन रोजेकी छन् । उनले गत वर्ष बेलायत छाडेर कोस्टारिकामा बस्न थालेकी थिइन् ।