लुम्बिनी बचाउ महाअभियानका संयोजक अक्राम खान रिहा

लुम्बिनी । लुम्बिनी बचाउ महाअभियानका संयोजक अक्राम खान रिहा भएका छन् । संस्कृति, पर्यटन तथा नागरिक उड्डयनमन्त्री खड्कराज पौडेलको पुत्ला दहन गरेको घटनालाई लिएर प्रहरीले नियन्त्रणमा लिएका खान मंगलबार दिउँसो रिहा भएका हुन् । उनीसँगै पक्राउ परेका वाजिउद्दिन मुसलमान पनि रिहा भएका छन् ।

लुम्बिनी विकास कोषका नवनियुक्त उपाध्यक्ष आनी छोइङ डोल्माको नियुक्तिको विरोध गर्दै आएको महाअभियानका संयोजक खानसहित दुई जनालाई रुपन्देही प्रहरीले सोमबार राति नियन्त्रणमा लिएको थियो । उनीहरूलाई भीम अस्पतालमा सामान्य स्वास्थ्य परीक्षणपछि राति नै जिल्ला प्रहरी कार्यालयमा लगिएको थियो ।

उक्त अभियानले सोमबार साँझ लुम्बिनीको पर्साचोकमा पर्यटनमन्त्री पौडेलको पुत्ला दहन गर्दै उनको राजीनामा माग गरेको थियो । सार्वजनिक शान्ति सुव्यवस्थामा खलल पुर्‍याएको भन्दै प्रहरीले उनीहरूलाई पक्राउ गरेको जनाएको थियो ।

प्रहरीसँगको छलफलका क्रममा आगामी दिनमा आन्दोलनको स्वरूप परिवर्तन गर्ने, लुम्बिनी क्षेत्रमा सडक अवरोध गर्ने तथा पुत्ला दहन गर्ने गतिविधि नगरी शान्तिपूर्ण विरोध गर्ने सहमति भएको छ ।

मंगलबार दिउँसो राष्ट्रिय स्वतन्त्र पार्टीका सांसद कन्हैया बनिया र तौफिक अहमद खानको रोहवरमा भाइ फकरुद्दिन खानको जिम्मा लगाएर रिहा गरिएको प्रहरीले जनाएको छ ।

संस्कृति, पर्यटन तथा नागरिक उड्डयन मन्त्रालयको प्रस्तावमा गायिकासमेत रहेकी बौद्ध भिक्षु आनीलाई ३० असोजमा बसेको मन्त्रिपरिषद् बैठकले विकास कोषको उपाध्यक्षमा नियुक्त गरेको थियो ।

आनी लुम्बिनी विकास कोषको उपाध्यक्षमा नियुक्त भएदेखि नै महाअभियानले स्थानीयको भावना र बौद्ध दर्शनको मर्मविपरीत नियुक्ति गरिएको भन्दै यो निर्णय कार्यान्वयन हुन नसक्ने बताउँदै चरणबद्ध रूपमा आन्दोलन गर्दै आएको छ । संयोजक खानले आफूहरू कानुनी राज्यको सम्मान गर्ने बताउँदै लुम्बिनीवासीको हकहितका लागि अभियान जारी रहने बताए ।