चोरीको मोटरसाइकलसहित रौतहटका युवक भारतमा पक्राउ

रौतहट, असोज २७ । भारतको झरौखर प्रहरीले सैनिक रोडबाट चोरीको मोटरसाइकलसहित नेपालका रौतहट जिल्लाका एक युवकलाई पक्राउ गरेको छ।

प्रहरीको नियन्त्रणमा पर्ने युवक रौतहट जिल्लाको कटहरिया नगरपालिका–१ निवासी रामबाबु राय यादवका छोरा गजेन्द्र यादव रहेको बताइएको छ। प्रारम्भिक विवरणअनुसार, पक्राउ परेका गजेन्द्र यादवले उक्त चोरीको मोटरसाइकल बेच्ने व्यक्तिका रूपमा कटहरिया नगरपालिका–३, बिर्ती पस्टोका निवासी सुरज यादवको नाम खुलाएको जनाइएको छ।

घटनाबारे भारतीय प्रहरीले थप अनुसन्धान गरिरहेको छ। मोटरसाइकल कहाँबाट चोरी भएको हो र घटनामा अन्य व्यक्तिको संलग्नता छ वा छैन भन्ने विषय अनुसन्धानपछि थप स्पष्ट हुने अपेक्षा गरिएको छ।