कांग्रेस १५औँ महाधिवेशनमा उमेदवारी दर्ता जारी

काठमाडौं । नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिका विभिन्न पदमा उमेदवारी दर्ता सुरु गरिएको छ ।महाधिवेशन निर्वाचन समितिले मंगलबार (असोज २०) दिउँसो साढे १२ देखि अपराह्न ४ बजेसम्म उमेदवारी मनोनयन दर्ताको समय निर्धारण गरेको छ ।

मनोनयनपत्र दर्ता सुरु भएसँगै उमेदवारी दिन आउने नेताहरूको भीड बढ्न थालेको मिडिया सेन्टरका संयोजक जीवन भण्डारीले जानकारी दिए । कांग्रेसमा यसपटक केन्द्रीय कार्यसमितिको आकार १६७ बाट बढाएर २९७ सदस्यीय बनाइएको छ ।

सोमबार (असोज १९) महाधिवेशनको बन्दसत्रबाट संशोधित विधान पारित गरी पदाधिकारी संख्या १४ बाट बढाएर २६ पुर्‍याइएको छ ।