भारतीय ठेकेदार सम्पर्कविहीन भएपछि रौतहटबाट अलपत्र ४२ भारतीय मजदुरको उद्धार

रौतहट । रौतहटमा अलपत्र परेका ४२ भारतीय नागरिकको उद्धार गरी रौतहट प्रहरीले उनीहरूकै निवासतर्फ पठाएको छ । भारतीय ठेकेदारमार्फत काम गर्न आएका भारतीय नागरिक रौतहटको इट्टाभट्टामा अलपत्र परेपछि प्रहरीले उद्धार गरी भारतीय सीमा सुरक्षा बलको जिम्मा लगाएको छ।

गुजरा नगरपालिका–५ लक्ष्मीपुरस्थित महमद मुजामिलले सञ्चालन गरेको मदिना इँटा भट्टामा काम गर्न आएका १२ पुरुष, ११ महिला तथा उनीहरूका आश्रित १० बालक र ९ बालिका गरी ४२ जना अलपत्र भारतीय नागरिकको उद्धार गरी उनीहरूकै देश पठाइएको हो।

भारतीय ठेकेदारमार्फत कामका लागि ल्याइएको भएपनि ठेकेदार सम्पर्कविहीन भएपछि उनीहरू अलपत्र परेको जानकारी पाएपछि उद्धार गरी भारतीय प्रहरीको जिम्मा लगाइएको जिल्ला प्रहरी कार्यालय रौतहटका प्रहरी नायब उपरीक्षक वसन्त गौतमले बताउनुभयो। अलपत्र परेका भारतीय नागरिकको जिल्ला प्रहरी कार्यालय रौतहट तथा इलाका प्रहरी कार्यालय लक्ष्मीनियाँ विजयपुरबाट संयुक्त प्रहरी टोली परिचालन गरी उद्धार गरिएको हो।

घटनाबारे आवश्यक अनुसन्धानपछि प्रहरीले बुधबार साँझ ५ बजे ४२ जनालाई उद्धार गरी ना.७ ख १६७५ नम्बरको बसमार्फत गौर भन्सार हुँदै सीमावर्ती भारतीय सीमा सुरक्षा बल (I/C AHTU, 20 Bn SSB F Coy) बर्गिनियाका प्रहरीलाई सकुशल जिम्मा लगाइएको प्रहरीले जनाएको छ।