खोटाङको मंगलटारमा आगलागी हुँदा, दुई घर जलेर नष्ट

काठमाडौँ । विद्युत् फल्ट (चुहावट) हुँदा खोटाङकाे हलेसी तुवाचुङ नगरपालिका–६ मंगलटारमा दुई घर जलेर नष्ट भएका छन् ।

गएराति करिब नौ बजे मंगलटारका स्थानीयवासी कृष्णकुमार राईको घरमा जडान गरिएको विद्युत् फल्ट हुँदा उनका दुईवटा घर जलेर नष्ट भएका हुन् ।

वैदेशिक रोजगारीको सिलसिलामा संयुक्त अधिराज्यमा रहेका कृष्णकुमारकी श्रीमती तारा र कान्छा छोरा मात्र बस्दै आएको उक्त घरमा गएराति आगलागी भएको स्थानीयले बताएका छन् ।

जस्तापाताको छाना तथा ढुंगा–माटोले बनेको दुईतले घरमा विद्युत्‌काे फल्ट भएर आगलागी भएको प्रहरीको प्रारम्भिक अनुमान छ ।

रातको समयमा भएको आगलागी जनप्रतिनिधि, स्थानीयवासी र प्रहरी टोलीले नियन्त्रणमा लिएको जेठा छोरा रम्बोहाङ राईले जानकारी दिए ।

आगलागीबाट कृष्णकुमारका दुईवटा घर तथा घरभित्र रहेको नगद २० हजार रुपैयाँ, लत्ताकपडा, भाँडावर्तन, खाद्यान्न, महत्त्वपूर्ण कागजातलगायत सामग्री जलेर नष्ट भएको जनाइएको छ ।

आगलागीको घटनाको यकिन विवरण आउन बाँकी रहेको जिल्ला प्रहरी कार्यालय खोटाङका प्रमुख प्रहरी नायब उपरीक्षक प्रकाश बुढाथोकीले जानकारी दिए ।