युरोपेली हतियार भारतविरुद्ध प्रयोग भइरहेका छन् : जयशङ्कर

दिल्ली । भारतीय विदेशमन्त्री एस जयशङ्करले भारतको रुस नीतिको आलोचना गर्ने युरोपेली देशहरूलाई कडा जवाफ फर्काएका छन् । मन्त्री जयशङ्करले युरोपेली देशहरूले बेचेका हतियारहरू वर्षौँदेखि भारतविरुद्ध प्रयोग भइरहेको उल्लेख गर्दै रुसी तेल खरिदको विषयमा नयाँ दिल्लीमाथि प्रश्न उठाउने युरोपको दोहोरो मापदण्डको आलोचना गरेका छन् ।

उनले भने–‘युरोपले त्यस्ता हतियारहरू बेच्दछ, जुन भारतविरुद्ध प्रयोग हुन्छन् । यो अहिले मात्र होइन, धेरै वर्षदेखि भइरहेको छ । हामी भारतीयहरूले युरोपलाई खतरामा पार्ने कुनै काम कहिल्यै गरेका छैनौँ ।’

फिनल्याण्डमा आयोजित ‘कुल्तारान्ता टक्स’मा ‘उदीयमान शक्तिहरू र नयाँ भूराजनीतिक प्रतिस्पर्धा’ विषयक छलफलका क्रममा उनले यस्तो टिप्पणी गरेका हुन् । उक्त कार्यक्रममा युक्रेन द्वन्द्व सुरु भएयता भारतले रुसतर्फ ‘धेरै सहानुभूति देखाएको’ र रुसी तेलमा बढी निर्भर रहेको भनी सोधिएको प्रश्नमा जयशङ्करले कडा प्रतिवाद गरेका हुन् ।

आफ्नो ऊर्जा खरिदको निर्णय भूराजनीतिबाट नभई आर्थिक दृष्टिकोणबाट प्रेरित भएको जयशङ्करले प्रष्ट पारेका छन् भने युक्रेन युद्धपछि बजारको बदलिँदो परिस्थितिका कारण रुसी तेल सबैभन्दा सहज विकल्प बनेको उनको भनाइ थियो ।

विदेश मन्त्री जयशङ्करले प्रतिबन्ध, व्यापार र ऊर्जा सुरक्षाका विषयमा पश्चिमी देशहरूको विरोधाभासी दृष्टिकोणमाथि प्रश्न उठाउँदै जटिल भूराजनीतिक मुद्दाहरूमा छनोटपूर्ण मापदण्ड लागू नगर्न चेतावनी दिएका छन् ।