दुबई पुलिसको चेतावनी: नक्कली अनलाइन पार्ट–टाइम रोजगारीका अफरबाट सतर्क रहन आग्रह

i 

Photo source: AI

प्रवासयूएई/ दुबई पुलिसले अनलाइनमा फैलिरहेका नक्कली पार्ट–टाइम तथा रिमोट रोजगारीका विज्ञापनप्रति सर्वसाधारणलाई सचेत रहन आग्रह गरेको छ। सामाजिक सञ्जालमार्फत जारी चेतावनीमा प्रहरीले सजिलो आम्दानीको प्रलोभन देखाएर गरिने यस्ता अफरहरू ठगीको माध्यम बन्ने गरेको जनाएको छ।

प्रहरीका अनुसार पछिल्लो समय ‘घरबाटै काम’, ‘थोरै समयमै उच्च आम्दानी’ जस्ता आकर्षक सन्देशसहितका विज्ञापनहरू बढ्दै गएका छन्, जसले नागरिकलाई आर्थिक क्षति पुर्‍याउनुका साथै व्यक्तिगत र बैंकिङ जानकारी दुरुपयोग हुने जोखिम बढाएको छ।

दुबई पुलिसले कुनै पनि रोजगारीका नाममा पैसा माग्ने प्रस्तावहरू शंकास्पद हुने स्पष्ट पार्दै यस्ता अफरहरू तुरुन्तै अस्वीकार गर्न आग्रह गरेको छ। साथै, रोजगारीको वैधता सम्बन्धित कम्पनीको आधिकारिक वेबसाइट, दर्ता विवरण तथा विश्वसनीय स्रोतमार्फत अनिवार्य रूपमा पुष्टि गर्न सुझाव दिएको छ।

प्रहरीले शंकास्पद विज्ञापन, सन्देश वा फोन कल प्राप्त भएमा त्यसमा प्रतिक्रिया नदिन र तुरुन्तै आधिकारिक च्यानलमार्फत जानकारी गराउन अनुरोध गरेको छ। समयमै रिपोर्ट गर्दा ठगी नियन्त्रण गर्न र अन्य नागरिकलाई सुरक्षित राख्न सहयोग पुग्ने प्रहरीको भनाइ छ।

दुबई पुलिसले सबैलाई डिजिटल प्लेटफर्म प्रयोग गर्दा सतर्कता अपनाउन, व्यक्तिगत विवरण गोप्य राख्न र सजिलो आम्दानीको लोभमा नपर्न पुनः आग्रह गरेको छ।