अवैध सम्बन्धका कारण दुई पति मारिए, पत्नी र प्रेमीहरू पक्राउ

मेरठ । भारतको उत्तर प्रदेशको मेरठ जिल्लामा अवैध सम्बन्धका कारण पतिहरूको हत्याका दुई छुट्टाछुट्टै घटनाहरू सार्वजनिक भएका छन् । दुवै घटनामा पत्नीहरूले आफ्ना प्रेमीहरूसँग मिलेर पतिको हत्या योजना बनाएको पाइएको छ । प्रहरीले दुवै घटनाका आरोपीहरूलाई पक्राउ गरेको छ । 

आजतकको रिपोर्टअनुसार मेरठको परीक्षितगढ थाना क्षेत्रको अगवानपुर गाउँमा राहुल नामक व्यक्तिको हत्या गरिएको छ । प्रहरीले राहुलकी पत्नी अञ्जली र सोही गाउँका उनका प्रेमी अजयलाई पक्राउ गरेको छ ।प्रहरीका अनुसार राहुलकी पत्नी अञ्जलीको गाउँकै अजयसँग अवैध सम्बन्ध थियो । जब राहुलले उनीहरूको सम्बन्धबारे थाहा पाए, तब अञ्जली र अजयले उनको हत्याको योजना बनाए । 

नोभेम्बर १० को राति अजयले राहुललाई खेतमा भेट्न बोलाए र गोली हाने । गोली लागेर राहुलको घटनास्थलमै मृत्यु भयो । त्यसपछि अजय फरार भए । भोलिपल्ट बिहान राहुलको शव झाडीमा भेटियो । राहुलका बुबा टेकचन्दले प्रहरी चौकीमा उजुरी दर्ता गराएपछि प्रहरीले अनुसन्धान सुरु गर्‍यो । 

एसएसपी मेरठ विपिन ताडाले हत्याको कारण पत्नी र प्रेमीको अवैध सम्बन्ध रहेको बताएका छन् । मोबाइल लोकेसन र कल डिटेल्सबाट दुवैको संलग्नताको प्रमाण फेला परेको थियो । घटनापछि अजय फरार थिए । बिहीबार बिहान प्रहरीले अजय भाग्ने तयारीमा रहेको सूचना पाएपछि घेराबन्दी गरी पक्राउ गरेको थियो । उनको साथबाट ३१५ बोरको पिस्तोल र तीन राउन्ड जिउँदो कारतूस बरामद भएको छ । अञ्जलीलाई पनि प्रहरीले पक्राउ गरेको छ । सोधपुछका क्रममा अजयले डेढ वर्षदेखि दुवैबिच सम्बन्ध रहेको स्वीकार गरेका छन् । 

दोस्रो घटनाः घाँटी थिचेर नहरमा फालियो 

मेरठमै अर्को घटना पनि बाहिर आएको छ, जहाँ एक महिलाले प्रेम प्रसंगका कारण आफ्ना पतिको हत्या गराएकी छन् । समाचारमा जनाइएअनुसार यो घटना रोहटा थाना क्षेत्रको रसूलपुर गाउँको हो । प्रहरीले यस घटनामा मृतककी पत्नी, उनका प्रेमी र प्रेमीका साथीलाई पक्राउ गरेको छ । 

एसपी अभिजीत कुमारका अनुसार मृतक अनिल (३२) की पत्नी काजलको गाउँकै आकाश नामका युवकसँग अवैध सम्बन्ध थियो । दुवैले मिलेर अनिलको हत्याको योजना बनाए । काजलले पहिले अनिललाई नशालु औषधि खुवाइन्, त्यसपछि आकाश र उनका साथी बादलसँग मिलेर गङ्ग नहर पुल नजिकै सलले घाँटी थिचिन् । जब अनिल पूर्ण रूपमा मरेनन्, तब उनलाई अधमरो अवस्थामा नहरमा फालियो । 

प्रहरीले आरोपीहरूको बयानका आधारमा उक्त सल र नशालु औषधिको पत्ता बरामद गरेको छ । सोधपुछमा तीनै जनाले अपराध स्वीकार गरेका छन् । अनिलको शव अहिलेसम्म फेला परेको छैन । प्रहरीले तीनै आरोपीलाई जेल पठाएको छ र शवको खोजी जारी छ ।