कपिलवस्तु शुद्धोधन गाउँपालिका अध्यक्ष कमलेशशरण चौधरी पक्राउ

बुटवल, जेठ ६ । रुपन्देही प्रहरीले कपिलवस्तु शुद्धोधन गाउँपालिका अध्यक्ष कमलेशशरण चौधरीलाई पक्राउ गरेको छ। उनलाई विद्युतीय अपराध (साइबर क्राइम) मुद्दामा पक्राउ गरेको हो । जिल्ला अदालत रुपन्देहीले पक्राउ पुर्जी जारी गरेपछि उनलाई इलाका प्रहरी कार्यालय बुटवलले पक्राउ गरेका हुन ।

अध्यक्ष चौधरीले बलात्कृत युवती तथा उनको परिवारको गोपनीयता सार्वजनिक गरेको अभियोगमा पक्राउ गरिएको हो । रूपन्देही जिल्ला अदालतले जेठ १ गते इलाका प्रहरी कार्यालय बुटवललाई चौधरीलाई पक्राउ गर्न आदेश दिएको थियो ।

अदालतको आदेशपछि चौधरी केही दिन सम्पर्कविहीन थिए । मंगलबार भने उनी बुटवल आएको बेला इलाका प्रहरी कार्यालय बुटवलको टोलीले पक्राउ गरेको प्रहरी नायब उपरीक्षक इन्द्रबहादुर रानाले जानकारी दिए ।

चौधरीलाई पक्राउ गरेर बुझाउन इलाका प्रहरी कार्यालयले जिल्ला प्रहरी कार्यालय कपिलवस्तुलाई सोमबार पत्राचार गरेको थियो । पक्राउ परेका चौधरीलाई प्रहरीले अनुसन्धान र म्याद थप प्रक्रियाका लागि सरकारी वकिल कार्यालय लगेको छ । उनी लोसपाबाट पालिका अध्यक्षमा निर्वाचित भएका थिए ।