ससुराली हिँडेका शिवशंकरको विभत्स हत्या, जंगलमा भेटियो शव

महोत्तरी। महोत्तरीको जंगलमा एक युवकको धारिलो हतियारले प्रहार गरी हत्या गरेको अवस्थामा शव फेला परेको छ ।

महोत्तरीका प्रहरी प्रवक्ता प्रहरी नायव उपरीक्षक सन्तुलाल प्रसाद जैसवारका अनुसार शुक्रबार साँझ साढे ५ बजेको समयमा गौशाला नगरपालिका ८ स्थित सागरनाथ वन विकास परियोजनाको जंगलमा युवकको शव फेला परेको हो।

धनुषाको क्षिरेश्वरनाथ नगरपालिका ८ दिगम्बरपुर बस्ने २५ वर्षीय शिवशंकर महतोको जंगलमा रेल्वे ट्रयाकको दक्षिणतर्फ घाँटीमा धारिलो हतियार प्रहार गरिएको अवस्थामा शव फेला परेको प्रवक्ता जैसवारले बताए । शवको सनाखत भएपछि हत्याको घटनामा अनुसन्धान अगाडि बढाइएको बताए ।

दिगम्बरपुरका स्थानीयका अनुसार शिवशंकर बिहीबार दिउँसो श्रीमती सृजना, १० महिने छोरासहित घरबाट ससुराली महोत्तरीको बर्दिबासका लागि निस्केका थिए ।