कपिलवस्तुमा हत्या गरी गाडिएको शव सनाखत, अभियुक्तलाई चाडै कानुनको दायरामा ल्याउछौ: प्रहरी

कपिलवस्तु । कपिलवस्तुमा निर्मम हत्या गरी गाडिएको अवस्थामा फेला परेको शवको सनाखत भएको छ। फेला परेकाे शव कपिलवस्तुको महाराजगन्ज नगरपालिका– ६ भलवारीका २७ बर्षिय शिव कुमार कुर्मीको भएको प्रहरी नायब उपरीक्षक हरि बहादुर वली जानकारी दिए।

कपिलवस्तु नगरपालिका– ४ पिपरी गाउँ नजिकैको नहरको कुलोमा आइतबार साँझ शरीर जलाइएको र टाउको नभएको अवस्थामा शव फेला परेको थियो। मृतक कुर्मी गत शनिबार साँझ देखि सम्पर्कविहीन थिए। नजिकै घुमेर आउँछु भनेर घरबाट निस्केका उनी सम्पर्कविहीन भएको पारिवारिक श्रोतले जनाएको छ।

लुम्बिनी प्रादेशिक अस्पताल बुटवलमा रहेको शवलाई मृतकका भाइले सनाखत गरेका थिए। शरीरको केही भागमा जलेको अवस्थामा रहेको जिन्सको ज्याकेट, कपडा लगायतका कुरा आफ्नै छोराको रहेको मृतकका बुवा रामपतिले बताए।

शवलाई पोस्टमर्टमकालागि सोमबार बुटवल लगिएको थियो। प्रहरीले घटनाको अनुसन्धान सूक्ष्म रुपले गरिरहेकाे प्रहरी उपरीक्षक नवरत्न पौडेलले नवलपुर टुडेलाई बताए । घटनाका अभियुक्तलाई चाडै कानुनको दायरामा ल्याउने उनले बताए।