हेगसेथ र रुबियोले पद नछाड्ने ह्वाइट हाउसको दाबी

वासिङ्टन । अमेरिकामा हालै सम्पन्न मध्यावधि चुनावमा सत्तारुढ रिपब्लिकन पार्टीले क्षति व्यहोरेपछि रक्षामन्त्री पिट हेगसेथ र विदेशमन्त्री मार्को रुबियोले पद छाड्ने हल्लालाई ह्वाइट हाउसले अस्वीकार गरेको छ।

ट्रम्प प्रशासनमा व्यापक हेरफेर हुन सक्ने अमेरिकी सञ्चारमाध्यमको अनुमानबीच ह्वाइट हाउसको यो भनाइ आएको हो। विशेषगरी ९ महिनादेखि जारी इरान युद्धको व्यवस्थापनलाई लिएर रक्षामन्त्री हेगसेथको चर्को आलोचना भइरहेको छ। यही युद्धका कारण रिपब्लिकन पार्टीले चुनावमा ठूलो हार व्यहोरेको र डेमोक्र्याटहरूले अमेरिकी तल्लो सदन (हाउस अफ रेप्रिजेन्टेटिभ्स) र माथिल्लो सदन (सिनेट) दुवैमा पूर्ण नियन्त्रण कायम गरेको मानिएको छ।

स्वयं राष्ट्रपति डोनाल्ड ट्रम्प र उपराष्ट्रपति जेडी भान्स दुवैले चुनावमा भएको क्षतिको मुख्य कारण इरान युद्धलाई नै मानेका छन्।

चुनावको नतिजासँगै रक्षामन्त्री हेगसेथको राजनीतिक भविष्य अनिश्चित देखिएको छ। ट्रम्पका आलोचक मानिने रिपब्लिकन पार्टीकै सांसद थोमस मासीले आगामी साता हेगसेथविरुद्ध महाभियोग प्रस्ताव ल्याउने तयारी गरेको पोलिटिकोलाई बताएका छन्। जनवरीमा डेमोक्र्याट-नियन्त्रित नयाँ कंग्रेस बन्नुअघि नै ट्रम्पले हेगसेथलाई हटाउनुपर्ने मासीको तर्क छ।

यसको जवाफमा हेगसेथले एक भिडियो सन्देश जारी गर्दै आफ्नो बचाउ गरेका छन्। असन्तुष्ट सांसद र डेमोक्र्याटहरूले ‘झुटो महाभियोग’ को प्रयास गरेको भन्दै उनले भनेका छन्, ‘उनीहरू ममाथि र हामीमाथि आक्रमण गरिरहेका छन् किनभने हामी प्रभावकारी छौं। उनीहरूको यो प्रयास सफल हुनेछैन र हामी पछि हट्ने छैनौं।’ हेगसेथले सैन्य भर्ना बढाउने र रक्षा औद्योगिक आधारको पुनर्निर्माण गर्नेलगायतका ‘अमेरिका फर्स्ट’ एजेन्डामा आफूले काम गरेको दाबी गरेका छन्। साथै, उनी टेनेसीबाट सिनेटको चुनाव लड्न इच्छुक रहेको हल्ला पनि चलेको छ।

यसैबीच, एबीसी न्युजसँगको कुराकानीमा राष्ट्रपति ट्रम्पले हेगसेथको विषयमा आफूलाई धेरै कलहरू आएको स्वीकार गरे पनि उनलाई पदमै राखिराख्ने आफ्नो मनसाय रहेको स्पष्ट पारेका छन्।
विदेशमन्त्री मार्को रुबियोले सन् २०२८ को राष्ट्रपतीय चुनावको तयारीका लागि पद छाड्न लागेको भन्ने रिपोर्टहरूलाई अस्विकार गरेका छन्।

न्युयोर्क टाइम्ससँगको अन्तर्वार्तामा रुबियोले ट्रम्पको कार्यकालको अन्त्यसम्म काम गर्ने आफ्नो योजना रहेको बताएका छन्। ‘म अहिले गरिरहेको कामलाई माया गर्छु,’ रुबियोले भने, ‘उनीहरूले म पद छाड्दैछु भन्दा मलाई हाँसो उठ्छ।’