सुर्खेतमा बुद्धको एटिआर–७२ को परीक्षण उडान सफल, जनवरीदेखि दैनिक दुई उडान भर्ने

काठमाडौं,  कात्तिक ३० । सुर्खेत विमानस्थलमा बुधबार बुद्ध एयरको एटिआर–७२ विमानले परीक्षण उडान गरेको छ । नागरिक उड्डयन प्राधिकरणको सहयोग र सहकार्यमा बुद्धले उक्त जहाजमार्फत परीक्षण उडान गरेको हो । अन्ततः परीक्षण उडान सफल भएको छ ।

१ फेब्रुअरी २०१३ देखि ब्रीचक्राफ्ट जहाजमार्फत सुर्खेत उडान सुरू गरेको बुद्धले जनवरी २०२३ देखि एटिआर–७२ जहाजमार्फत दैनिक दुई उडान सञ्चालन गर्ने जनाएको छ । बुधबार प्रेस विज्ञप्ती जारी गर्दै यात्रुको माग र भाडादर कम गराउने उद्देश्यले कम्पनीले ठूलो जहाज प्रयोग गर्ने योजना अगाडि बढाएको जानकारी दिएको छ ।

एटिआर–७२ जहाजमार्फत उडान गर्दा यात्रुहरूलाई प्रत्यक्ष लाभ महसुस हुने गरी नेपालगञ्ज सेक्टर हाराहारीमा न्यूनतम भाडादर कायम हुने विज्ञप्तीमा उल्लेख छ । ‘सुर्खेत उडान गर्ने यात्रुहरूको मागअनुरूप सिट उपलब्धता न्यून रहेको तथ्यलाई आत्मसाथ गर्दै एटिआर–७२ मार्फत उडान सञ्चालन आवश्यकता महसुस भएकाले र हाल सञ्चालनमा रहेको जहाजको उडान सञ्चालन लागत उच्च रहेको र यसको प्रत्यक्ष असर भाडादरमा पर्ने गरेको छ’ विज्ञप्तीमा भनिएको छ।

कम्पनीले यात्रुहरूलाई सस्तो भाडादरका साथै थप सिटहरू उपलब्ध गराइ सेवा विस्तार गर्ने उद्देश्यले एटिआर–७२ मार्फत उडान गर्न लागेको बताए । त्यस्तै, बुद्ध एअरले आगामी डिसेम्बरभित्र थप दुईवटा एटिआर–७२ जहाज ल्याउन लागेको कम्पनीले विज्ञप्तिमा जनाएको छ ।