बुद्ध एयरको उडान ढिलाइ हुँदा राजविराज विमानस्थलमा यात्रु चार घण्टादेखि प्रतीक्षामा

राम नारायण

2KShares

सारांश

सप्तरीको राजविराज विमानस्थलबाट काठमाडौं जाने बुद्ध एयरको नियमित उडान चार घण्टाभन्दा बढी समयदेखि ढिला भएको छ।
दिउँसो १ बजेदेखि प्रतीक्षामा रहेका यात्रुहरूलाई साँझ ५ बजे मात्र जहाज उड्ने जानकारी गराइएको थियो।
एउटै मात्र उडान हुँदा समयमै उडान नभएपछि यात्रुहरूले सास्ती व्यहोर्नुका साथै उनीहरूको कामकाज प्रभावित भएको छ।

राजविराज । सप्तरीको राजविराज विमानस्थलबाट सञ्चालन हुने बुद्ध एयरको एक मात्र नियमित उडान ढिलाइ हुँदा यात्रुहरू चार घण्टाभन्दा बढी समयदेखि प्रतीक्षामा बस्न बाध्य भएका छन् ।

सोमबार दिउँसो १ बजेदेखि काठमाडौं जाने उडानको प्रतीक्षामा बसेका यात्रुहरूले साँझ ५ बजेसम्म पनि विमानस्थलबाट उडान हुन नसकेको बताएका छन् ।

काठमाडौंस्थित विमानस्थलबाट जहाज उडेको जानकारी टिकट काउन्टरका कर्मचारीले साँझ ५ बजेपछि मात्रै यात्रुहरूलाई गराएका थिए । उडान ढिलाइका कारण यात्रुहरूले लामो समय विमानस्थलमै कुर्नुपरेको छ ।

टिकट काउन्टरका एक कर्मचारीका अनुसार अघिल्लो दिन आइतबार काठमाडौंका लागि साँझ ७ बजे उडान भएको थियो । उनले सोमबारको उडान भने त्यसको तुलनामा छिटो हुने जानकारी दिँदै भने, ‘हिजो ७ बजेकाे थियो, आज छिटो छ ।’

राजविराज विमानस्थलमा बुद्ध एयरको एउटै मात्र उडान रहेकाले उडान ढिलाइ हुँदा यात्रुहरू थप समस्यामा पर्ने गरेका छन् । समयमै उडान नहुँदा यात्रुहरूको समय र अन्य कामकाज प्रभावित हुने गरेको छ ।