कृष्णनगरमा लालपुर्जा वितरणमै विभेदको प्रश्न ! वडा नं. ८ का नागरिक अझै वञ्चित, सेवाग्राहीसँग रसिदबिनै ५० रुपैयाँ असुलीको गुनासो

कार्तिक १९ । कपिलवस्तुको कृष्णनगर नगरपालिकामा २६९ घरजग्गाधनीले जग्गाधनी दर्ता प्रमाणपुर्जा (लालपुर्जा) प्राप्त गरेका छन्। तर, वर्षौंदेखि जग्गा भोगचलन गर्दै आएका छिमेकी वडा नं. ८ का नागरिक भने अझै लालपुर्जाको प्रतीक्षामा छन्। एउटै नगरपालिकाभित्र केही वडाका नागरिकले लालपुर्जा पाउँदा अर्को वडाका नागरिक कहिलेसम्म वञ्चित हुने भन्ने प्रश्न उठेको छ।

कृष्णनगर नगरपालिका वडा नं. १, ७ र ९ अन्तर्गतका गाउँब्लक जग्गाधनीलाई लक्षित गरी बिहीबार वडा नं. ९ को कार्यालय परिसरमा लालपुर्जा वितरण कार्यक्रम आयोजना गरिएको हो। कृष्णनगर नगरपालिका र नापी कार्यालय कपिलवस्तुको संयुक्त आयोजनामा भएको कार्यक्रममा २६९ घरजग्गाधनीलाई प्रमाणपुर्जा वितरण गरिएको नगरप्रमुख रजत प्रताप शाहले जानकारी दिनुभयो।

कार्यक्रममा उपप्रमुख आरती देवी चौधरी, जनप्रतिनिधि, नापी कार्यालयका प्रमुख तथा कर्मचारी र स्थानीयवासीको उपस्थिति रहेको थियो।