बुद्ध एयरको उडान ढिलाइ हुँदा यात्रुहरू घण्टौँदेखि अलपत्र

राजविराज । सप्तरीको राजविराज विमानस्थलमा बुद्ध एयरको उडान ढिलाइ हुँदा यात्रुहरू घण्टौँदेखि अलपत्र परेका छन् । सोमबार दिउँसो १ बजेदेखि काठमाडौं जान विमानस्थल पुगेका यात्रुहरू रातिसम्म उडान नहुँदा समस्यामा परेका हुन् ।

काठमाडौंंबाट दिउँसो २ बजे आउनुपर्ने विमान ढिलोगरी साँझ ५ः३० बजे राजविराज अवतरण गरेको थियो । विमानको चक्का पङ्चर भएको भन्दै विमानस्थल व्यवस्थापनले राति करिब ९ बजे उडान हुने आश्वासन दिएको यात्रुहरूले बताएका छन् ।

उडान ढिलाइले राति १० बजे विदेश जाने टिकट भएका यात्रुदेखि भोलिपल्ट परीक्षा दिनुपर्ने विद्यार्थीसमेत प्रभावित भएका छन् । लामो समयको प्रतीक्षाले यात्रुहरू भोक र थकानले हैरान भएका छन् ।
यात्रुहरूले उडान ढिलाइका कारण विदेश यात्रा र शैक्षिक भविष्य प्रभावित हुने भन्दै सम्बन्धित निकायसँग जवाफदेहिता र क्षतिपूर्तिको माग गरेका छन् ।