इन्धनको मूल्य बढेर आयो, निगमले मूल्य बृद्धि नगर्ने

काठमाडौं । इन्धनको मूल्य बढेर आए पनि नेपाल आयल निगमले आम उपभोक्ताको हित र चाडपर्वलाई मध्यनजर गर्दै हालको खुद्रा बिक्री मूल्यमा वृद्धि नगर्ने निर्णय गरेको छ। भारतबाट इन्धनको मूल्य बढेर आए पनि मूल्य यथावत राखिएको निगमनले जानकारी दिएको छ ।

निगमका अनुसार नयाँ मूल्य सूचीअनुसार पेट्रोलमा प्रतिलिटर २० रुपियाँ ४४ पैसा, डिजेलमा २० रुपियाँ २१ पैसा, मट्टितेलमा १५ रुपियाँ ९६ पैसा र हवाई इन्धनमा प्रतिलिटर १८ रुपियाँ ६६ पैसा मूल्य बढेर आएको छ। एलपी ग्यासमा प्रति सिलिण्डर ८१ रुपियाँ ३२ पैसाले मूल्य वृद्धि भएर आएको निगमले जनाएको छ ।

पेट्रोलियम पदार्थको मूल्य यथावत राख्दा निगमलाई आर्थिक भार थपिएको छ। निगमले दिएको जानकारीअनुसार मूल्य समायोजन नगर्दा निगमलाई पाक्षिक रूपमा करिब ३ अर्ब २० करोड ३८ लाख रुपियाँ घाटा हुनेछ ।