स्ट्रेट अफ होर्मुजमा इरानको कडाइ, नियम उल्लङ्घन गरेको भन्दै फर्काइरहेछ जहाज

तेहरान । इरानले स्ट्रेट अफ होर्मुज हुँदै अवैध र असुरक्षित मार्ग प्रयोग गर्न खोजेका केही जहाजलाई आफ्नो मार्ग परिवर्तन गर्न बाध्य बनाएको छ । इरानी सरकारी सञ्चारमाध्यम आईआरआईबीले सोमबार एक उच्च स्रोतलाई उद्धृत गर्दै यस्तो जानकारी दिएको हो ।

रिपोर्टअनुसार छ वटा जहाजले आफ्नो नेभिगेसन तथा अवस्थिति पहिचान गर्ने प्रणाली बन्द गरेर स्ट्रेट अफ होर्मुजको दक्षिणी भागबाट अवैध र असुरक्षित मार्ग प्रयोग गर्ने प्रयास गरेका थिए । इरानले ती जहाजहरूले अमेरिकी सेनाको प्रोत्साहनमा यस्तो कदम चालेको आरोप पनि लगाएको छ ।

यसअघि आइतबार पनि आईआरआईबीले इरानी सुरक्षाबलले पटक–पटक चेतावनी दिएपछि कम्तीमा छ वटा जहाजलाई समुद्रमै लंगर हाल्न र इरानी समुद्री आदेश पालना गर्न बाध्य बनाइएको जनाएको थियो । स्ट्रेट अफ होर्मुज विश्वकै सबैभन्दा महत्वपूर्ण ऊर्जा ढुवानी मार्गमध्ये एक हो । विश्व बजारमा खपत हुने झन्डै २० प्रतिशत तेल र प्राकृतिक ग्यास यही जलमार्ग हुँदै अन्तर्राष्ट्रिय बजारमा पुग्ने भएकाले यस क्षेत्रको तनावले विश्व ऊर्जा आपूर्ति र अन्तर्राष्ट्रिय व्यापारमा गम्भीर असर पार्ने गरेको छ ।