ट्रम्पको ५० प्रतिशत नयाँ भन्सार कर लागू भए जवाफ दिन क्यानडा तयार

ओट्टावा । क्यानडाका प्रधानमन्त्री मार्क कार्नीले अमेरिकी राष्ट्रपति डोनाल्ड ट्रम्पले घोषणा गरेको ५० प्रतिशत नयाँ भन्सार कर लागू भए त्यसको उचित जवाफ दिन क्यानडा पूर्ण रूपमा तयार रहेको बताएका छन् ।

उनले अमेरिकासँग व्यापक व्यापार सम्झौता गर्न वार्तालाई तीव्र बनाइएको भए पनि आवश्यक परे प्रतिकारात्मक कदम चाल्न सकिने स्पष्ट पारे । प्रिन्स एडवर्ड आइल्यान्डको चार्लोटटाउनमा प्रान्तीय तथा क्षेत्रीय सरकार प्रमुखहरूसँगको बैठकपछि सञ्चारकर्मीसँग कुरा गर्दै कार्नीले नयाँ अमेरिकी कर अगस्ट १९ देखि लागू हुने तय भए पनि त्यसअघि नै प्रतिक्रिया दिनु उपयुक्त नहुने बताए ।

अमेरिकाले घोषणा गरेको ५० प्रतिशत भन्सार कर मह, मदिरा, सिमेन्ट, दुग्धजन्य वस्तु, काठका केही उत्पादन, हकी स्टिक लगायत विभिन्न क्यानडाली वस्तुमा लाग्नेछ । तर ऊर्जा, पोटास, माछा तथा महत्वपूर्ण खनिजजस्ता वस्तुहरू भने यस करबाट बाहिर राखिएका छन् । यसअघि संयुक्त राज्य अमेरिका–मेक्सिको–क्यानडा सम्झौताअन्तर्गत कर छुट पाएका केही वस्तुहरूमा पनि अब नयाँ कर लाग्नेछ । सन् २०२० मा लागू भएको उक्त व्यापार सम्झौता अमेरिकाले नवीकरण नगरेपछि नयाँ वार्ता सुरु भएको हो, जुन सन् २०३६ सम्म चल्न सक्ने अनुमान गरिएको छ ।

कार्नीले अमेरिकी अधिकारीहरू व्यापार सम्झौतामा पुग्न इच्छुक देखिएको पनि बताए । उनका अनुसार अमेरिकाले विगतका व्यापार वार्ताहरूमा पनि अन्तिम म्याद तोक्ने र त्यसअघि उच्च भन्सार करको चेतावनी दिने रणनीति अपनाउँदै आएको छ । प्रिन्स एडवर्ड आइल्यान्डका प्रधानमन्त्री रोब लान्ट्जले संघीय सरकार र सबै प्रान्तहरू एकताबद्ध भएर अमेरिकी कदमको सामना गरिरहेको बताए । उनका अनुसार राष्ट्रिय हितको रक्षा गर्न ‘टिम क्यानडा’को साझा दृष्टिकोण आवश्यक छ ।

व्यापार वार्ताको नतिजा जस्तोसुकै आए पनि क्यानडाले आफ्नै अर्थतन्त्रलाई थप बलियो बनाउने, उद्योग, किसान, श्रमिक र व्यवसायलाई सहयोग गर्ने तथा अमेरिकी बजारमाथिको निर्भरता घटाउन अन्य देशहरूसँग व्यापारिक सम्बन्ध विस्तार गर्ने नीति अघि बढाइने प्रधानमन्त्री कार्नीले बताए ।