एनआरएनए कतारमा एकता पछि आर्थिक पारदर्शिताबारे छानबिन, सागर नेपाललाई अध्ययन जिम्मेवारी

दोहा । एनआरएनए कतारमा एकता पछि आर्थिक पारदर्शिताबारे छानतारमा लामो समयदेखि जारी विवाद समाधान भई हालै एकता घोषणा भएपछि संगठनको आर्थिक तथा प्रशासनिक अवस्थाबारे विस्तृत अध्ययन सुरु गरिएको छ । एकीकृत एनसीसी कतारको हिसाब मिलान तथा प्रतिवेदन अध्ययनको जिम्मेवारी आइसीसीका संस्थापक सदस्य सागर नेपाललाई दिइएको छ ।

विगत लामो समयदेखि एनसीसी कतारमा तीन अलग–अलग पक्ष—बद्री केसी, विनोद कुँवर र कुल आचार्य समूहका—समानान्तर समितिहरू क्रियाशील रहेका थिए। नेतृत्व विवाद र आन्तरिक असमझदारीका कारण संगठन विभाजित अवस्थामा रहेको थियो । तर हालै भएको सहमति र एकता घोषणापछि सबै पक्ष एउटै संरचनामा आउँदै २०२३–२०२५ कार्यकालका सम्पूर्ण गतिविधिहरूको समीक्षा गर्ने निर्णय गरिएको हो ।

एकता प्रक्रिया अघि बढेसँगै सो अवधिमा सञ्चालन भएका छुट्टाछुट्टै समितिहरूले गरेका आर्थिक कारोबार, खर्च विवरण, आय–व्यय तथा संगठनात्मक गतिविधिहरूको पारदर्शी अध्ययन गर्न सागर नेपालको संयोजकत्वमा विशेष समिति गठन गरिएको छ । उक्त समितिलाई ‘एकीकृत एनसीसी कतार प्रतिवेदन अध्ययन तथा अनुसन्धान समिति कार्यविधि–२०२६’ पनि औपचारिक रूपमा हस्तान्तरण गरिएको बताइएको छ । समितिको मुख्य जिम्मेवारी विगतमा देखिएको तीन फरक संरचनाका आर्थिक प्रतिवेदनहरूलाई एकीकृत गरी वास्तविक वित्तीय अवस्था पहिचान गर्नु, खर्चहरूको वैधता जाँच गर्नु तथा संगठनभित्र देखिएको असमझदारीको मूल कारण पहिल्याउनु रहेको छ ।

साथै भविष्यमा एनसीसी कतारलाई थप पारदर्शी, जिम्मेवार र व्यवस्थित बनाउन आवश्यक सुझावहरू पनि समितिले प्रस्तुत गर्नेछ । यसैबीच, एनआरएनए कतारको १०औँ अधिवेशनका लागि गठन गरिएको निर्वाचन समितिको आर्थिक विवरणमाथि पनि प्रश्न उठेको छ । निर्वाचन समितिका संयोजक क्रान्ति सिंहले तयार पारेको आर्थिक हिसाबकिताब सम्बन्धित समितिका सदस्यहरूलाई पर्याप्त जानकारी नगराई पेस गरिएको भन्दै असन्तुष्टि व्यक्त गरिएको छ ।

समितिका सदस्यहरूले उक्त आर्थिक विवरण ढिलो गरी तयार गरिएको र सदस्यहरूलाई समयमै जानकारी नदिई प्रस्तुत गरिएको आरोप लगाएका छन् । उनीहरूको भनाइ अनुसार यस प्रक्रियाले आर्थिक पारदर्शितामा गम्भीर प्रश्न उठाएको छ र संगठनभित्र विश्वासको वातावरण कमजोर बनाएको छ । निर्वाचन समितिको खर्च विवरणबारे स्पष्टता नआएसम्म संगठनभित्रको विवाद पूर्ण रूपमा समाधान नहुने केही सदस्यहरूको धारणा छ । उनीहरूले सम्पूर्ण वित्तीय गतिविधिहरू स्वतन्त्र र निष्पक्ष रूपमा छानबिन हुनुपर्ने माग समेत गरेका छन् ।

यसै सन्दर्भमा, हाल गठन गरिएको अध्ययन तथा अनुसन्धान समितिले सबै कागजात, खर्च विवरण र प्रतिवेदनहरूको गहिरो अध्ययन गर्ने तयारी गरेको छ । समितिको प्रतिवेदनले एनआरएनए कतारको आगामी कार्यदिशा, आर्थिक पारदर्शिता र संस्थागत सुधारमा महत्वपूर्ण भूमिका खेल्ने अपेक्षा गरिएको छ । संगठन एकताबद्ध भए पनि विगतका आर्थिक तथा प्रशासनिक विवादहरू पूर्ण रूपमा समाधान नभएसम्म स्थायी स्थिरता हासिल गर्न कठिन हुने विश्लेषण गरिएको छ । त्यसैले सागर नेपाल नेतृत्वको समितिलाई अबको चरणमा सबैभन्दा संवेदनशील र महत्वपूर्ण जिम्मेवारी प्राप्त भएको देखिन्छ ।