दाङ दुर्घटना अपडेट : घाइते तीन जनालाई थप उपचारको लागि नेपालगन्ज लगियो

बुटवल । दाङमा बस दुर्घटनामा परेर घाइते भएका तीन जनालाई थप उपचारको लागि नेपालगन्ज लगिएको छ । बाँकी १० जना सामान्य उपचारपछि डिस्चार्ज भएको जिल्ला प्रहरी कार्यालय दाङले जनाएको छ ।

सुर्खेतबाट काठमाडौँ जाँदै गरेको बस दाङको बबई गाउँपालिका–२ तल्लो ट्वाङ्खोलाको घुम्तीमा गएराति दुर्घटना भएको थियो । कर्णाली प्रदेश ०२–००१ ख –०७०१ नम्बरको बस दुर्घटनामा परेको हो । इलाका प्रहरी कार्यालय खिलतपुर र हापुरेको प्रहरी टोलीले घाईतेको उद्धार गरेको खिलतपुरका प्रहरी निरीक्षक खिमबहादुर खड्काले जानकारी दिए ।

उनले कच्ची सडक भएकाले बसले नियन्त्रण गुमाउन पुग्दा दुर्घटना भएको देखिएको बताए । राप्ती प्रादेशिक अस्पताल तुलसीपुरमा उपचारपछि तीन जनालाई रिफर गरिएको र बाँकी डिस्चार्ज भएको प्रहरीले जनाएको छ । बसमा ५५ जना यात्रु सवार थिए ।