गाडी दुर्घटना गराएर प्रकाश भुजेल फरार, दुई जना घाइते

काठमाडौं । ‘भाइरल झाँक्री’ प्रकाश भुजेल गाडी दुर्घटना गराएर फरार भएका छन् । शंखरापुर नगरपालिका–९ इन्द्रायणीमा गाडी दुर्घटना गराएर उनी फरार भएका हुन् । गाडी सडकबाट घरको सटरमा पुगेर ठोक्किएको छ।

मोटरसाइकल र स्कुटर ठोक्किएपछि जोगाउन खोज्दा उनको गाडी अनियन्त्रित भएर घरमा ठोक्किएको बताइएको छ। गाडी उनी आफैले चलाएको स्थानीय प्रत्यक्षदर्शीले जानकारी दिएका छन् । साँखुमा प्रकाश मानव सेवा सांस्कृतिक झाँक्री केन्द्र सञ्चालन गरेका र सामाजिक सञ्जालमा छाइरहने भुजेलको गाडीले ठक्कर दिँदा मोटरसाइकल चालक गम्भीर घाइते भएका छन् ।

घटनाबारे अनुसन्धान भइरहेको र घाइतेलाई उपचारका लागि पठाइएको प्रहरीले जनाएको छ । फरार भएका प्रकाश भुजेलको खोजी भइरहेको प्रहरीले जनाएको छ।