स्वीट्जरल्यान्डलाई पेनाल्टी सुटआउटमा हराउँदै इंग्ल्यान्ड सेमिफाइनलमा

काठमाडौं । टाइब्रेकरमा स्वीट्जरल्यान्डलाई हराउँदै इंग्ल्यान्डले लगातार दोस्रोपटक युरोपियन च्याम्पियनसिपको सेमिफाइनलमा स्थान बनाएको छ । शनिबार राति मेर्कुर स्पेइल एरिनामा भएको खेलमा स्वीस टिमविरुद्ध पेनाल्टी सुटआउटमा ५–३ को जित निकाल्दै इंग्ल्यान्डले सेमिफाइलन यात्रा तय गरेको हो ।

इंग्लिस फुटबलको इतिहासमा हालसम्म इंग्ल्यान्ड चार पटकमात्र टाइब्रेकरमा जित निकालेको छ । जसमा आजको नतिजासहित इंग्ल्यान्डले दुई पटक स्वीस टिमविरुद्ध नै जित निकालेको हो । इंग्ल्यान्डले यसअघि सन् २०१९ को यूईएफए नेसन्स लिगमा स्वीस टिमलाई टाइब्रेकरमा निराश बनाएको थियो ।

खेलको निर्धारित र अतिरिक्त समय १–१ को बराबरीमा समाप्त भएपछि नतिजाको निर्णय पेनाल्टी सुटआउटबाट भएको हो । टाइब्रेकरमा इंग्ल्यान्डबाट प्रहारका लागि आएका कुनै पनि खेलाडीले गल्ती गरेनन् । इंग्ल्यान्डका ट्रेन्ट एलेसान्डर आर्नोल्ड, इभान टोनी, बुकायो साका, जुड बेलिङ्घम र कोल पाल्मेरले गोल गरे । स्वीट्जरल्यान्डका फाबियन सार, जेद्रान साक्विरी र जेकी अम्डोउनीले गोल गरे । तर, पहिलो प्रहारका लागि आएका म्यानुयल अकान्जीको प्रहारलाई भने इंग्लिस गोलकिपरले विफल बनाएका थिए ।

त्यसअघि खेलमा सुरुआती अग्रता स्वीट्जरल्यान्डले नै बनाएको थियो । ७५औँ मिनेटमा ब्रिल इम्बोलीले गोल गर्दै स्वीस टिमलाई अग्रतामा राखेका थिए । स्वीट्जरल्यान्डको यो अग्रता लामो समय टिक्न भने सकेन । त्यसको पाँच मिनेटपछि नै बुकायो साकाले १८ यार्ड बक्स बाहिरबाट ‘सेकेन्ड बार’ मा उत्कृष्ट गोल गर्दै इंग्लिस टिमलाई खेलमा फर्काएका थिए ।

स्वीट्जरल्यान्ड ठूला प्रतियोगिताको क्वार्टरफाइनलबाट बाहिरिएको यो पाँचौँपटक हो । यसअघि स्वीट्जरल्यान्डले सन् १९३४, १९३८ र १९५४ को विश्वकपमा र सन् २०२० को युरोपियन च्याम्पियनसिपमा क्वार्टरफाइनलसम्मको यात्रा तय गरेको हो ।

जितसँगै इंग्ल्यान्डले अब फाइनल प्रवेशका लागि टर्कीया र नेदरल्यान्ड्सबीचको विजेतासँग खेल्ने भएको छ । इंग्ल्यान्ड गत संस्करणको फाइनलमा पुगे पनि इटालीसँग पेनाल्टी सुटआउटमा पराजित भएपछि उपविजेतामा खुम्चिएको थियो ।