बुटवलका बैदवार फार्मेसीका सञ्चालक बिक पक्राउ

बुटवल, २७ वैशाख । बुटवलको कालिकानगरस्थित कालिका पथमा रहेको बैदवार फार्मेसीका सञ्चालक पक्राउ परेका छन् । पक्राउ पर्नेमा फार्मेसी सञ्चालक कमलबहादुर बिक रहेका छन् ।

औषधि जस्तो संवेदनशील वस्तु डाक्टरको सिफारिसबिना बिक्री वितरण गर्ने गरेको र विभिन्न औषधि मिलाएर लागुऔषधका रूपमा युवाहरूलाई बिक्री वितरण गर्ने गरेको पाइएपछि ईलाका प्रहरी कार्यालय बुटवलले सञ्चालकलाई नियन्त्रणमा लिएको हो ।

पेट दुख्दा खाने औषधि डाईसाकोमिन पृगावलेन जो दुखाई कम गर्न खाने गरिन्छ यी दुई औषधि मिलाएर लागुऔषध प्रयोगकर्तालाई बिक्री गरेको पाइएको हो । ईलाका प्रहरी कार्यालय बुटवलका प्रमुख विजय राज पण्डितले भने लागुऔषध प्रयोगकर्ताहरूको सूचनाको आधारमा मेडिकलमा छापा मारेको बताए ।
डाक्टरको सिफारिसबिना औषधि बिक्री वितरण गरेको केही औषधिहरू लागुऔषधका रूपमा प्रयोग गर्ने गरी मिलाएर बिक्री गरेको पाइएको प्रमुख पण्डितको भनाई छ ।

प्रहरीले मेडिकल सञ्चालकको घरबाट ठूलो परिणाममा त्यस्ता औषधि फेला परेको बताएको छ । प्रहरीले केही लागुऔषध प्रयोगकर्ता र मेडिकल सञ्चालकलाई नियन्त्रणमा लिएर अनुसन्धान अगाडि बढाएको छ । औषधि ब्यवसायी संघ रूपन्देहीले डाक्टरको सिफारिसबिना औषधि बिक्री गर्नु गैरकानुनी रहेको बताएको छ ।

पक्राउ पर्ने फार्मेसी सञ्चालक कमलबहादुर बिक अछामको तुर्माखाँद गाउँपालिका वडा नम्बर ८ का बासिन्दा हुन् ।