श्रीलङ्काली राष्ट्रपतिलाई मृत्युदण्ड सुनाइएका थापासहित ३ नेपालीलाई आममाफी दिन राष्ट्रपति पौडेलले पठाए पत्र

नेपाली नागरिक चेत बहादुर थापा, तेज बहादुर तामाङ र सुक बहादुर तामाङ लामो समयदेखि श्रीलङ्काको जेलमा छन् । उनीहरूलाई लागू औषध कारोबारमा संलग्न रहेको अभियोग लागेको छ । उनीहरूको सजाय मानवीय आधारमा आममाफीको अनुरोध गर्दै श्रीलङ्काली राष्ट्रपतिलाई पत्र पठाउन मन्त्रिपरिषद्ले राष्ट्रपति पौडेललाई सिफारिस गरेको थियो ।

‘राष्ट्रपतिबाट पत्र पठाइसकेको छ, श्रीलङ्काली सरकारले के प्रतिक्रिया दियो त्यो चाहिँ सरकारलाई थाहा होला,’ राष्ट्रपति कार्यालयका एक उच्च अधिकृतले भने । उसो त तत्कालीन प्रधानमन्त्री पुष्पकमल दाहाल प्रचण्डले आठ वर्षअघि २०७३ सालमा भारतको गोवामा भएको ब्रिक्स सम्मेलनको क्रममा भएको भेटवार्तामा तत्कालीन श्रीलङ्काली राष्ट्रपति मैत्रीपाला सिरसेनासँग मृत्युदण्ड सुनाइएका ललितपुरका थापालगायतको फैसलामा पुनर्विचार गर्न आग्रह गरेका थिए ।

लामो समयसम्म नेपालको आग्रह नसुनिएपछि अनुरोध अझ ओजिलो होस् भनेर राष्ट्रपतिबाटै पत्राचार गरिएको परराष्ट्र मन्त्रालयका एक अधिकारीले बताए ।