फोटो पत्रकार वन्त नगदसहित सम्मानित

इटहरी, फागुन ७ । राष्ट्रिय फोटो पत्रकार समूह नेपालका केन्द्रीय अध्यक्ष प्रदीपराज वन्त सम्मानित हुनुभएको छ । वन्त प्रदेशखबर डटकमको प्रथम वार्षिकोत्सव अवसरमा उत्कृष्ट फोटो पत्रकारिता पुरस्कार २०८० बाट सम्मानित हुनुभएको हो ।

नगद ११ हजार १११ सहित सम्मानित हुनुभएका वन्त राष्ट्रिय समाचार समितिका सिनियर फोटो पत्रकार हुनुहुन्छ । प्रजातन्त्र दिवस तथा प्रदेश खबर डटकमको प्रथम वार्षिकोत्सवमा उहाँलाई सम्मान गरिएको हो। 

काठमाडौंमा रहेर व्यावसायिक फोटो पत्रकारिता तथा फोटो पत्रकारिताको प्रशिक्षकको भूमिका निर्वाह गर्दै वन्तले पत्रकारितामा फोटोको माध्यमबाट गर्नुभएको कामको उच्च मूल्याङ्कन गरी उहाँलाई पुरस्कार प्रदान गरिएको छ ।

फोटो पत्रकार वन्तलाई कार्यक्रमका प्रमुख अतिथि प्रतिनिधिसभाका उपसभामुख इन्दिरा रानाले सम्मानपत्र र पुरस्कार प्रदान गर्नुभयो । कार्यक्रम आयोजक नयन एड्भरटाइजिङ मिडियाका अध्यक्ष पवन अधिकारीका अनुसार वन्त काठमाडौंमा रहेर राजनीतिलगायत विभिन्न विधामा फोटो पत्रकारिता गर्दै आउनुभएको छ ।