नेदरल्यान्ड्समाथि नेपालको ९ विकेटको रवाफिलो जित

काठमाडौ । विश्वकप क्रिकेट लिग–२ अन्तर्गतको जारी त्रिकोणात्मक सिरिजको दोस्रो खेलमा नेपालले नेदरल्यान्ड्समाथि ९ विकेटको प्रभावसालि जित हासिल गरेको छ ।

नेदरल्यान्ड्समाथि रवाफिलो जित निकाल्ने क्रममा नेपालका लागि अनिल साह र आसिफ शेखले अर्धशतक प्रहार गर्दा अर्का ओपनर कुशल भुर्तेलले २८ रनको विष्फोटक इनिङ खेले।

जितसँगै नेपालले दोस्रो खेलमा लिग–२ को अङ्क तालिकामा खाता खोलेको छ। नेपालले २ सय ८ बल बाँकी हूँदै १ विकेट गुमाएर लक्ष्य पुरा गर्ने क्रममा आसिफ शेखले ४५ बलमा ८ चौका र १ छक्काको सहयोगमा ५४ रन बनाउँदा उनले करिअरको ११ औ अर्धशतक प्रहार गरे। त्यस्तै अनिलले ३६ बलमा ६ चौका र ४ छक्काको सहयोगमा ५७ रन बनाए। उनको यो दोस्रो ओडीआइ अर्धशतक हो।

त्यसअघि नेदरल्यान्ड्सले १ सय ३८ रनको लक्ष्य दिएको थियो। टियू मैदान कीर्तिपुरमा टस हारेर पहिले ब्याटिङ गरेको नेदरल्यान्ड्सले ३९ ओभरमा अलआउट हुँदै १ सय ३७ रन मात्र बनाउन सक्यो। नेदरल्यान्ड्सलाई कमजोर योगफलमा समेट्ने क्रममा नेपालका लागि कुशल भुर्तेलले ४ विकेट लिंदा ललित राजवंशीले २ विकेट लिए।

त्यस्तै सोमपाल कामी र रोहित पौडेलका नाममा १–१ विकेट रह्यो। नेदरल्यान्ड्सका लागि कप्तान स्कट एडवार्ड्सले ३३ रन बनाउँदा बास डि लिडले २७ रन बनाएका थिए। त्यस्तै स्याब्रन्ड इंगलब्रेच्टले २३ रन बनाउँदा म्याक्स ओड्वाड र आर्यन दतले समान १०–१० रन बनाउँदा नोच क्रोस १२ रनमा आउट भए। क्याली क्लेइनले ११ रन बनाए।