बुटवल उपमहानगरको १४औँ नगरसभामा प्रमुख पाण्डेयले प्रस्तुत गरे विकासका योजना

उनले नगरलाई हरियाली बनाउन मुख्य सडक र भित्री सडक तथा अन्य खुला क्षेत्रमा वृक्षारोपण तथा ४५ दिने सरसफाइ अभियान सञ्चालन गरी नगरलाई सफा राख्न बुटवलवासीलाई प्रोत्साहन गरिएको पनि बताए । नगर प्रमुख पाण्डेयले उज्यालो बुटवल कार्यक्रमअन्तर्गत मुख्य मुख्य चोकहरूमा हाइमास्ट लाइट तथा भित्री सडक र गल्लीहरूमा स्मार्ट स्ट्रिट लाइट जडान तथा सौन्दर्यीकरणको काम अगाडि बढेको र यसले रात्रिकालीन बजार सञ्चालनमा समेत सघाउ पुग्ने बताए

यस्तै, नगर सभाको अधिवेशनको पहिलो बैठकमा जलस्रोत विधेयक टेबुल गरिएको छ भने नगर स्वास्थ्य ऐन, छाडा चौपाया व्यवस्थापन र नियन्त्रण (गौशाला सञ्चालन) विधेयक र नगर शिक्षा ऐन संशोधन प्रस्ताव टेबुल गरिएको छ । अधिवेशनको पहिलो बैठकमा विधेयक समितिका संयोजक नरेन्द्र बस्नेतले विधेयक र ऐन संशोधनको प्रस्ताव टेबुल गरेका हुन् । नगर सभाको अर्को बैठक शुक्रबार दिउँसो ३ बजे बस्ने गरी स्थगित भएको उपमहानगरका प्रवक्ता शिव रानाले बताए ।