झापामा जंगली हात्ती मृत फेला

झापा, मंसिर २८ । झापामा जंगली हात्ती मृत अवस्थामा फेला परेको छ । 

बिहीबार बिहान बाह्रदशी गाउँपालिका – १ स्थित बागमतामा जंगली भाले हात्ती मृत अवस्थामा फेला परेको जिल्‍ला प्रहरी कार्यालय झापाले जानकारी दिएको छ । 

बिहान ८ बजे हात्ती मृत फेला परेको भन्ने खबर पाएपछि ईलाका प्रहरी कार्यालय राजगढ झापाबाट प्रहरी वरिष्ट नायब निरीक्षक मदनकुमार मैनालीको कमान्डमा प्रहरीको टोली खटिएको थियो । 

हात्ती स्थानीय नगेन्द्र राईको बारीमा फेला परेको हो । बाहिरी चोट नदेखिएको प्रहरीले जनाएको छ । वन कार्यालयको कर्मचारीले घटनास्थलको अनुसन्धान तथा कानुनी प्रक्रियाको काम गरिरहेको प्रहरीले जनाएको छ ।