सर्लाहीमा छोराको कुटाइबाट बुवाको मृत्यु

सर्लाही, कात्तिक १० गते । सर्लाहीको हरिवन नगरपालिका –३, डाबरीमा कोदालो प्रहार गरी छोराले बुवाको हत्या गरेका छन् । 

स्थानीय ३५ वर्षीय गोकर्ण मैनालीले घरायसी विवादमा कोदालो प्रहार गरी बुवा ८१ वर्षका ओमप्रसाद मैनालीको हत्या गरेका हुन् । बुधबार राति गोकर्णले कोदालो प्रहार गर्दा ओमप्रसाद गम्भीर घाइते हुनुभएको थियो । 

ओमप्रसादलाई बिहीबार बिहान घाइते अवस्थामा गाउँलेले देखेपछि उपचारका लागि नमूना अस्पताल हरिवन ल्याएका थिए । यहाँ उपचार सम्भव नभएपछि उहाँलाई पुरानो मेडिकल कलेज चितवन रेफर गरिएकोमा उपचारकै क्रममा बिहीबार राति १० बजेतिर चिकित्सकले मृत घोषणा गरेको इलाका प्रहरी कार्यालय हरिवनले जनाएको छ । 

बुवाको हत्यामा संलग्न गोकर्णलाई प्रहरीले नियन्त्रणमा लिएको छ । उनलाई हरिवन नगरपालिका –४, तीनघरे लच्का क्षेत्रमा हिँड्डुल गरिरहेको अवस्थामा शुक्रबार बिहान पक्राउ गरिएको हरिवनका प्रहरी निरीक्षक अनिल गिरीले जानकारी दिनुभयो । 

प्रहरी निरीक्षक गिरीका अनुसार घटनाको सम्वन्धमा थप अनुसन्धान जारी छ । बुवाको हत्यामा संलग्न गोकर्ण ओमप्रसादका माइलो छोरा हुन् । भारतमा बसेर मजदुरी गर्ने गोकर्ण दसैँ मनाउन भनी घर आएका थिए ।